भांगरभूंय | प्रतिनिधी
फोंडें, प्रतिनिधी: उडीवाडो- उसगांवां बुधवारा सांजेवेळार गडगडा सयत झडिल्ल्या पावसांत वीज पडून साईश तिळवे (१४), अक्षिता तिळवे आनी अश्विका नायक हीं तिगां जखमी जालीं. अश्विका नायक हिचेर पिळयेंच्या मुळाव्या भलायकी केंद्रांत उपचार चालू आसात. जाल्यार हेर दोगांचेर काल रातीं उसरां उपचार करून तांकां घरा धाडलीं. वीज कोसळिल्ल्यान नायक आनी तिळवे ह्या शेजार्यांच्या घरांतलीं विजेर चलपी सगळीं उपकरणां लासून गोबोर जाल्यांत. ताका लागून लाखांनी रुपयांचें लुकसाण जालां.
मेळिल्ले म्हायती प्रमाण, बुधवारा सांजेच्या सुमार ६ वरांचेर गडगड्या सयत रकपी पावसांत वीज कोसळ्ळी. ह्या वेळार घराचे फाटले वटेन आशिल्लें अश्विका नायक हें जखमी जालें. तशेंच ट्युशनाक गेल्लो साईश तिळवे हो आठवेंत शिकपी विद्यार्थ्याक धपको बसून रस्त्यार कोसळ्ळो. रस्त्या कुशीक आशिल्लें अक्षिता तिळवे हेंय जखमी जालें. जखमींक पिळये भलायकी केंद्रांत दाखल केलीं. साईश तिळवे आनी अक्षीता तिळवे हांचेर उपचार केले उपरांत रातीं सुमार ११.३० वरांचेर मुळाव्या भलायकी केंद्रांतल्यान घरा धाडलें. जाल्यार अश्विका नायक हाचेर भलायकी केंद्रांत उपचार सुरू आसात.
नायक आनी तिळवे हांच्या घरांतली टीव्ही, फ्रिज, वॉशिंग मशीन, फॅन, मोबायल फोन, मिक्सर आनी हेर लायटीचेर चलपी यंत्रणां जळून गेलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
