भांगरभूंय | प्रतिनिधी
हालींच अमेरिकेंत अल्झायमर दुयेंसाचेर एक संशोधन केला. तातूंत एक लाखां परस चड लोकांचो आस्पाव केल्लो. दोन दशकां चलपी ह्या संशोधनांत अल्ट्रा प्रोसेस्ड फूडच्या वायट परिणामांचें वर्णन केलां. संशोधनांतल्यान अशें दिसून आयलां की, अल्ट्रा प्रोसेस्ड फूड खाल्यार स्मृतीभ्रंश जावंक शकता. ताका डिमेंशिया वा अल्झायमर अशेंय म्हण्टात. डिमेंशियांत मनशाची याद दुबळी जावंक लागता. जितले चड अल्ट्रा प्रोसेस्ड फूड खातात, तितलेच तांकां डिमेंशिया जावपाचो धोको चड आसता अशें अमेरिकन अल्झायमर असोसिएशनाच्या संशोधनांतल्यान दिसून आयलां. संशोधनाच्या मतान हो धोको फकत जाण्ट्यांक आसा अशें ना. वायट आहाराक लागून खंयचेय पिरायेचेर हो दुयेंस जावपाचो धोको वाडटा.
मनशाची याद, विचार आनी समाजीक क्षमतायेचेर परिणाम करपी दुयेंस म्हळ्यार डिमेंशिया. डिमेंशियाचो त्रास सोंसपी लोक आपलीं दिसपट्टीं कामां विसरपाक लागतात. हें ताचे सुवातींचे लक्षण. पूण तुमकां विसरपाची समस्या आसा म्हणल्यार तुमकां डिमेंशिया आसाच अशें न्हय. दिसपट्टी म्हत्वाची कामां विसरपाक लागतात तेन्ना डिमेंशिया जाता. धूम्रपान, वायट आहार, उदासीनताय आनी तकलेक गंभीर जखम जावप हे ह्या दुयेंसाचे धोक्याचें घटक.
डिमेंशियाचीं लक्षणां..
० विसरपाची समस्या
० कांयच नियोजन करप शक्य न जावप
० उतरां उलोवपाक आडखळप
० कांय काम म्हत्वाचें आसल्यार तेंय विसरप
० घुसपल्ले आसप
कसो बचाव करचो…
० मन सक्रिय दवरात
० धूम्रपान करु नाकात
० व्हिटॅमिन डी घेवप
० दर दिसा व्यायाम करचो
० आहाराची जतनाय घेवप
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
