भांगरभूंय | प्रतिनिधी
बंगळुरू, खबरां संस्था: अंतरिक्ष आनी ते संबंदीत जायत्यो संकल्पना इस्रोन भारतीयां खातीर खूब सोंप्या पद्दतीन हाडल्यो आनी पुराय देशाची ह्या इस्रो मिशनांची आवड वाडली. चांद्रयान तिनाक मेळिल्लें येस हो हाचोच एक म्हत्वाचो टप्पो आशिल्लो.
भारतीय अंतरिक्ष संशोधन संघटणा म्हळ्यार इस्रो फुडलीं कांय वर्सां अशीं कांय म्हत्वाचीं मिशनां हातांत घेवपाचीं आसा. इस्रोचे मुखेली एस. सोमनाथ हांणीय हे विशीं म्हायती दिली.
चांद्रयान ३ मोहिमेक मेळिल्ल्या येसा उपरांत आतां वट्ट तीन वर्सांनी म्हळ्यार २०२७ त चांद्रयान ४ ही मोहीम इस्रो हातांत घेतलें. आजून हे मोहिमेक सरकाराची परवानगी मेळूंक ना. ती मेळ्ळें उपरांतूच हे मोहिमेच्या कामाचो वेग वाडटलो. अशें जरी आसलें तरी हे मोहिमे खातीरची तयारी इस्रोन आतां पसूनच सुरू केल्या अशी म्हायती इस्त्रोचे विज्ञानीक सचीव शंतनू भाटवडेकार हांणी दिली.
इस्रोच्या चांद्रयान ४ मिशना वरवीं चंद्राच्या खडपांचे नमुने हाडून तांची तपासणी करपाचो यत्न जातलो. तशेंच इस्रोन नासा वांगडा भागीदारी करून भारतीय अंतरिक्षयात्र्यांक अंतरिक्षांत धाडपाचीय तयारी केल्या. देखून फुडल्या वर्सांनी देशांतल्या लोकांची इस्रो कडल्यान अपेक्षा चड आसतली अशें म्हणप चुकीचें थारचें ना.
चांद्रयान ४ मोहीम इतली खाशेली कित्याक?
चांद्रयान ४ चंद्रावेली माती आनी फातरांचे नमुने हाडटलें. ताचे खातीर ह्या यानाचें सॉफ्ट लँडींग जावप तितलेंच म्हत्वाचें. हाचे परसूय म्हत्वाची गजाल आसतली ती म्हळ्यार स्पेस डॉकिंग. म्हळ्यार इस्रो चांद्रायन ४ क टप्प्याटप्प्यांनी आंतरिक्षांत धाडटलें. उपरांत आंतरिक्षांतूच ताची जोडणी करतले. ही मोहीम इस्रोन पयलेच फावट हातांत घेतिल्ल्यान आतां ही मोहीम येसस्वी करपा खातीर भारतीय शास्त्रज्ञांक येस मेळटलें हें पळोवप गरजेचें.
सोमनाथ हांणी दिल्ले म्हायती प्रमाण फुडल्या ५ वर्सांत इस्रो सुमार ७० उपग्रह अंतरिक्षांत धाडटले. तशेंच सगळ्यांत सकयल्या कक्षेंत स्थापन करपी उपग्रहांचोय हातूंत आसपाव आसतलो, तातूंतले ४ उपग्रह नॅव्हिक प्रादेशिक संचारण प्रणाली खातीर आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
