भांगरभूंय | प्रतिनिधी
न्यूयाॅर्क, खबरां संस्था ः अमेरिकेंत एका भारतीय दोतोराक अटक केल्या. ल्हान चलयो आनी बायलांचो नग्न व्हिडियो रेकॉर्ड करपाच्या प्रकरणांत ही कारवाय केल्या. ह्या दोतोरा कडेन पुलिसांक 13 हजार नग्न व्हिडियो मेळ्ळ्यात. हो दोतोर फाटलीं स वर्सां हे असले व्हिडियो रेकॉर्ड करतालो. ताचे कडल्यान पुलिसांनी 15 उपकरणांय जप्त केल्यांत. ताचें नांव उमैर एजाज आसा.
उमैर एजाज कोण?
डॉ. उमैर एजाज हो दोतोर. २०११ वर्सा तो वर्क व्हिसा घेवन अमेरिकेंत गेलो. ताणें सिनाई ग्रेस हॉस्पिटलांत रेसिडेन्ट दोतोर म्हणून इंटर्नशिप पुराय केली. उपरांत तो कांय वर्सां अलबामांतल्या डावसन शारांत रावलो. थंयच्यान तो मिशिगनांत आयलो आनी थंय प्रॅक्टीस करपाक लागलो. आतां मेरेन ताणें वेगवेगळ्या हॉस्पिटलांनी मेडिसीनाचो तज्ञ दोतोर म्हणून काम केलां.
8 ऑगस्टाक केली अटक
उमैराक 8 ऑगस्टाक पुलिसांनी अटक केली. हॉस्पिटलाच्या कुडींत, बाथरुम, चेंजिंग रूमांत ताणें लिपयिल्ले कॅमेरे लायिल्ले. इतलेंच न्हय तर ताणें आपल्या घरांत लेगीत गुप्त कॅमेरे बसयल्ले. ह्या कॅमेऱ्यांच्या आदाराचेर ताणें व्हिडियो काडल्यात. बायलां आनी ल्हान चलयांचे हजारांनी व्हिडियो आसात, तातूंत तीं नग्न आसात. दोन वर्सां पिरायेच्या चलये पसून ते जाण्टे बायले मेरेनचे व्हिडियो पुलिसांक मेळ्ळ्यात. ते उपरांत डॉ. उमैर हाचेर कारवाय केल्या. ताणें कांय व्हिडियो क्लाऊड स्टोरेजांत सेव्ह केल्यात, अशीय म्हायती पुलिसांनी दिल्या.
प्रकरण उजवाडाक कशें आयले?
एजाजाचे बायलेन हे विशीं म्हायती दिल्ली. ते प्रमाण ह्या दोतोराच्या घराचेर धाड घाली. ते उपरांत ही धक्को दिवपी भयानक घडणूक उक्ती जाली. एजाज उमैरा आड हाचे पयलीं खंयचोच गुन्यांव नोंद जावंक ना. 13 ऑगस्टाक ताचे आड एका बायलेचो नग्न व्हिडियो काडिल्ल्यान गुन्यांव नोंद जालो. ते उपरांत हे पुराय प्रकरण उजवाडाक आयले. फाटल्या स वर्सांत ह्या दोतोरान सुमार 13 हजार व्हिडियो तयार केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
