भांगरभूंय | प्रतिनिधी
नाशिक, खबरां संस्था: भावना कदम हे ४० वर्सां पिरायेचे लग्न जाल्ले शिक्षिके वांगडा आशिल्ल्या प्रेम संबंदान गगन कोकाटे ह्या २५ वर्सां पिरायेच्या तरणाट्याचो घेतलो जीव. भावना हिचे हेरां वांगडा संबंद आशिल्ल्याचो दुबाव घेवन तो तिका सेगीत व्हिडिओ कॉल करून विचारतालो. ह्या तरणाट्या कडल्यान आपली सुटका करून घेवपाक शिक्षिकेन आपल्या विद्यार्थ्यांक दोन लाखांची सुपारी दिली. तांणी त्या तरणाट्याचो खून केलो. ही घडणूक मेरी वाठारांत घडली. पंचवटी पुलिसांनी वट्ट एका वरा भितर गुन्यांव उक्ताडार हाडून शिक्षिकेक आनी हेर स दुबावीत आरोपींक अटक केली.
हे विशीं निरीक्षक मधुकर कड हांणी पत्रकार परिशदेंत म्हायती दिली. २०२० काळांत नेमान दूद घेवपा खातीर वतना मरण आयिल्ल्या गगन हाची वळख भावना (रा.वृंदावन, म्हसरूळ) हिचे कडेन जाली. दूदवाल्या कडल्यान मोबायल नंबर घेवन तीं एकामेकाच्या संपर्कांत आयलीं. उपरांत चार वर्सां ह्या दोगांय मदीं प्रेमसंबंद आशिल्ले. ही बायल एके संस्थेच्या रातच्या म्हाविद्यालयांत कंत्राटी शिक्षिका म्हणून काम करताली. तिचे हेर तरणाट्यां वांगडाय संबंद आशिल्ल्याचो दुबाव गगनाक आशिल्लो.
ताका लागून तो तिचेर सदांच पाळत दवरतालो. दर २० मिनटांनी खंय आसा, कोणा वांगडा आसा अशें विचारपा खातीर व्हिडिओ कॉल करतालो. ताका लागून शिक्षिकेन ताचे वांगडा संपर्क तोडिल्लो. तेन्ना तुजे अनैतिक संबंद तुजो घोव आनी १७ वर्सां पिरायेचे धुवेक सांगतलों, अश्यो धमक्यो दिल्ल्यान ती शिक्षिका उबगल्ली. निमाणें तिणें तिचो आदलो विद्यार्थी संकेत रणदिवे हाका गगनाची सुपारी दिली. संकेतान दुबावीत गौतम दुसाने, श्रावण आहेर, रितेश सपकाळे, यश खैरनार, मेहफुज सय्यद हांकां दरेकी २० हजार दिवन गगनाचो खून केलो. ह्या सगळ्यांक पुलिसांनी अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
