इनडोर क्लब धोरण गरजेचें

भांगरभूंय | प्रतिनिधी

डिलायला लोबोः कान फोडपी संगीत पार्ट्यो बंद जावपाक जाय

भांगरभूंय । प्रतिनिधी

म्हापशें: बार- रेस्टॅरंण्टाच्या नांवान परवाने घेवन दर्यादेग वाठारांनी खूबशीं आस्थापनां क्लबाच्या नांवान कान फोडपी आवाजान संगीत पार्ट्यो करतात. हो बेकायदेशीरपणा तत्काळ बंद जावपाक जाय. ते खातीर सरकारान इनडोर क्लब धोरण चालीक लावपाची गरज आसा, अशें मत आमदार डिलायला लोबो हांणी उक्तायलें.

बुधवारा 21 ऑगस्टाक हणजूण्यां एके कार्यावळी वेळार आमदार लोबो पत्रकारां कडेन उलयताली.

आमकां कोणाच्या पोटार पांय दिवपाचो ना, तशेंच संगीत लेगीत जाय. पूण तें कान फोडपी आसचें न्हय. ते खातीर आवाज आडावपी संगीत प्रणाली आशिल्ले इनडोर क्लब बांदून संगीत वाजोवचें वा गिरायकांक हेडफोन दिवचे. हेर राज्यांनी हें धोरण आसा, मागीर पर्यटन वाठार आशिल्ल्या गोंयांतूच कित्याक नाका, असोय प्रस्न आमदार लोबो हांणी उपस्थीत केलो.

हे मुखार बार- रेस्टॉरंण्टांक परवानगी दितना पंचायतींनी गाडयो पार्क करचे खातीर फावोशी सुवात आसा काय ना तें तपासुनूच परवाने दिवचे. कारण रस्त्या वयल्या अवेवस्थीत पार्किंगेंत लागून येरादारी कोंयडीची समस्या उप्रासता. तशेंच लोकांक मानसीक त्रास जातात, अशें आमदार लोबो हांणी सांगलें.

गोंय हें पर्यटनथळ आशिल्ल्यान पर्यटक गोंयांत येतात. पर्यटन हो आमचे अर्थवेवस्थेचो कणो आसा. ताका लागून गोंयांत पर्यटक येवपाकूच जाय, मात तांणी थळाव्या लोकांक गृहीत धरचे न्हय. खूब खेपे रातीं उसरां मेरेन चलपी पार्ट्यो दुसऱ्या दिसा फांतोडेर मेरेन चलतात. हाचो हणजूणें, वागातोरच्या लोकांक त्रास जाता. संगिताच्या आवाजान जनेलाचीं दारां हालतात. हे प्रकार बंद जावपाक जाय, अशेंय लोबो हांणी सांगलें.

रेस्टॉरंण्ट सारकिल्ल्या क्लब आस्थापनांनी ऑनलायन आवाज निरिक्षण प्रणाली बसोवपाची गरज आसा. हें प्रकरण सध्या न्यायालयांत आसा. सध्या सिकेरी हॅलिपॅड आनी हणजूणें पुलीस स्टेशना लागसार वागातोर दोंगर माथ्यार अश्यो दोन आवाज निरिक्षण यंत्रणा उबारल्या, अशी म्हायती लोबो हांणी दिली.

‘आवाज प्रदुशणाक सदांच आसतलो विरोध’

आमदार ह्या नात्यान आवाज प्रदुशणाक सदांच विरोध आसतलो. बार्देस उपजिल्होधिकारी, प्रदुशण नियंत्रण मंडळ आनी हेर प्रशासकीय अधिकाऱ्यां वांगडा पर्यावरण मंत्र्यान हालींच बसका घेतल्या. ह्या वेलार नवी समिती स्थापन केल्या. आवाज प्रदुशणाचेर नियंत्रण दवरचे खातीर हे समितीचे अध्यक्ष म्हूण उपजिल्होधिकाऱ्यांक गांवांत अचकीत (सरप्रायज) पळोवणी करपाचे निर्देश मंत्र्यान ह्या वेळार दिल्यात, अशें डिलायला लोबो हांणी सांगलें.