भांगरभूंय | प्रतिनिधी
प्रकाश वेळीपः 25 ऑगस्टाच्यान उटा मोहीम सुरू
भांगरभूंय । प्रतिनिधी
मडगांवः उटा संघटणोचो वर्धापनदीस 6 ऑक्टोबराक मनयतले. ते निमतान वाडा वाठारांत उटा हे मोहिमेची सुरवात केल्या. 25 ऑगस्टाक 10 म्हालांनी सुमार 100 वाड्यांचेर एकाच वेळार बसका जातल्यो. आरक्षणांतल्या क्रिमी लेयराचो सर्वोच्च न्यायालयाचो मुद्दो समासजाक मान्य ना. आंदोलनाक तेंको आसा, एसटी समाजांतल्या आमदारांनी सरकारा कडेन हो प्रस्न मांडचो, अशी मागणी उटा संघटणेचे अध्यक्ष प्रकाश वेळीप हांणी केली.
पत्रकार परिशद घेवन उटाच्या वर्धापनदिसाची म्हायती दिली. ह्या वेळार अध्यक्ष वेळीप हांचे सयत दुर्गादास गावडे, सतीश वेळीप, विश्वास गावडे, अनील गांवकार आनी हेर वांगडी हाजीर आशिल्ले.
जानेवारी 2003 त गावडा, कुणबी, वेळीप समाजाक एसटीचो दर्जो मेळ्ळो. एसटी दर्जो मेळोवचे खातीर खूब जाणांनी कश्ट घेतिल्ले. वर्सभराच्या काळांत संविधाना प्रमाण समाजाचे हक्क दिनात, अशें लक्षांत आयले उपरांत एसटी समाजांतल्या संघटणांनी एकठांय येवन युनायटेड ट्रायबल असोसिएशन अलायन्स (उटा) ही संघटणा 6 ऑक्टोबर 2004 ह्या दिसा स्थापन केली, अशें वेळीप हांणी सांगलें. अंदूं 6 ऑक्टोबराक उटा संघटणेचो वर्धापन दीस फर्मागुडयेर विवीध कार्यावळीं वरवीं 10 हजार समाज भावांचे हाजिरेंत मनयतले. वाडा वाठारांत उटा ही संकल्पना चालीक लायतली. ते प्रमाण फाटल्या म्हयन्यांत 500 समाज मुखेल्यांक प्रशिक्षण दिलां. तातूंतले 80 ते 85 कार्यकर्ते आपापल्या म्हालांत वावर करतले. 25 ऑगस्टाक गोंयांतल्या 10 म्हालांनी बसका जातल्यो. काणकोण, केपें, सांगें, धारबांदोडें, साश्ट, फोंडें, मुरगांव, तिसवाडी, सत्तरी, दिवचल ह्या म्हालांत उण्यांत उण्या 10 वाड्यांचेर बसका घेतले. गोंयांत एसटी भावांचे 700 वाडे आसात. पयल्या दिसा उण्यांत उण्या 100 वाड्यांचेर पावपाचो यत्न आसा. संस्थे कडल्यान आतां मेरेन समाजा खातीर केल्लो वावर पावयतले. तेचवरी संघर्शाची जाणीव नवे पिळगेक करून दितले. राज्य सरकाराच्यो येवजण्यो लोकां मेरेन व्हरतले, अशें तांणी सांगलें.
‘राजकी आरक्षणाचो प्रस्नूय बेगिनूच सुट्टलो’
रानहक्क कायद्या खाला सनद मेळपाचीं प्रकरणां पडून आसात. तशेंच राजकी आरक्षणाचो प्रस्न उटा सयत हेर संघटणांच्या सामुहीक यत्नांक लागून सुटावो जावपाच्या निमाण्या पांवड्यार आसा. केंद्र सरकाराच्या आस्वासना प्रमाण लोकसभेंत विधेयक मांडलां. फुडल्या संसदेच्या अधिवेशनांत ताका मंजुरी लेगीत मेळटली. ते उपरांत स म्हयन्यांच्या काळांत आरक्षणाची प्रक्रिया पुराय जातली, अशी आस्त प्रकाश वेळीप हांणी ह्या वेळार उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
