भांगरभूंय | प्रतिनिधी
म्हापशें, प्रतिनिधी ः कुशें- खोर्जुव्यां गांवांत पुर्तुगेज वेळाच्या घराच्या नुतनीकरणाच्या कामां वेळार फातराची वणत कोसळ्ळी. तिचे सकयल चिड्डून रमेश मावसकार (27, मुळ मध्य प्रदेश) ह्या कामगाराक मरण आयलें.
ही घडणूक मंगळारा 20 सांजवेळा उसरां घडली. कुशेंतलें हें पुर्तुगेज वेळाचे घर दुबयंत रावपी घराच्या मूळ धनयान दिल्लीच्या एका मनशाक रावपाक दिलां. त्या मनशान हालींच ह्या घराचें नुतनीकरणाचे काम करपाक घेतिल्लें. घराच्या फाटल्यान दोन कुडींचें एक ल्हान घर आसा. ते मोडपाचें काम चार कामगारां कडल्यान सुरू आशिल्ले.
मंगळारा घराची इबाडिल्ली फातराची वणत मोडपाचें काम सुरू आशिल्लें. ती वणत चुकून भितर कोसळ्ळी आनी थंय आशिल्ल्या कामगाराक त्या वणती पोंदा चिड्डून मरण आयलें. ताच्या तीन वांगड्यांनी ताका फातर, मातये पोंदच्यान भायर काडलो. पूण तो मेरेन ताका मरण आयिल्लें.
हे घडणुकेची म्हायती मेळ्ळ्या उपरांत म्हापशें पुलीस उपनिरिक्षक यशवंत मांद्रेकार आनी सहाय्यक उपनिरिक्षक अजय गांवकार हांणी थंय वचून पंचनामो केलो. ते उपरांत कुड पोस्टमार्टमा खातीर जीएमसींत धाडली. पुलिसांनी हे प्रकरण सैमिक मरण म्हूण नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
