भांगरभूंय | प्रतिनिधी
पणजी ः दयानंद बांदोडकार यादस्तीक फुटबॉल सर्तींत पयलेच खेपे अर्जेंटिना, ऑस्ट्रेलियांतले क्लब खेळटले. 24 ऑगस्टा सावन सर्तीची दुसरी आवृत्ती सुरू जातली, अशी म्हायती खेळां मंत्री गोविंद गावडे हांणी दिल्या. बुधवारा पर्वरे जाल्ले पत्रकार परिशदेंत ते उलयताले. ह्या वेळार गोवा फुटबॉल असोसिएशनाचे अध्यक्ष कायतानो फर्नांडीस, उपाध्यक्ष जॉनथन डिसोझा हाजीर आशिल्ले.
मंत्री गावडे हांणी सांगलें, गोंयच्या फुटबॉल इतिहासांत पयलेच खेपे दोन विदेशी क्लब गोंयांत जावपी सर्तींत खेळपाचे आसात. हातूंत ऑस्ट्रेलियन लीगांतलो 67 वर्सां पिरायेचो ब्रिस्बेन रोअर आनी अर्जेंटिना डिपोर्टीया डिफेंसिया वाय जस्टीसिया हांचो आस्पाव आसा. हाचे भायर इंडियन सुपर लीगचे एफसी गोंय, ओडिसा एफसी, चेन्नयीन एफसी, आय-लीगचे चर्चिल ब्रदर्स, धेम्पो क्लब हेय सर्तींत वांटो घेतले.
सर्तीत दोन गटांत दरेकी चार पंगड खेळटले. पयल्या गटांत एफसी गोंय, धेंपो, ब्रिस्बेन रोअर तशेंच जीपीएलांतले पात्र पंगड आसतले. जाल्यार दुसऱ्या गटांत ओडिशा, चेन्नयिन, चर्चिल ब्रदर्स आनी डिपोर्टिया हांचो आस्पाव आसा. सर्तीच्यो सगळ्यो मॅची फातोर्डाच्या पं. जवाहरलाल नेहरू स्टेडियमाचेर जातल्यो. निमाणी मॅच 6 सप्टेंबराक जातली. जैतिवंताक 15 लाख आनी उपविजेत्याक 8 लाख रुपयांचें इनाम दितले.
ह्या मॅचीची तिकेट 100 ते 200 रुपया आसा. मॅची चालू आसतना स्टेडियमांतल्यान भायर सरपी प्रेक्षकांक खंयच्याच कारणाक लागून परतून स्टेडियमांत प्रवेश मेळचो ना. सगल्या मॅचींचें लायव्ह स्ट्रीमिंग फिफा प्लस चॅनलाचेर जातलें. फाटल्या वर्साचे सर्तींत सुमार चार लाख लोकांनी लायव्ह स्ट्रीमिंगांतल्यान मॅची पळयल्यो अशी म्हायती मंत्री गोविंद गावडे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
