भांगरभूंय | प्रतिनिधी
पणजी, प्रतिनिधीः डेंग्यू आड झुजपाक पालिका कायद्यांत सुदारणा करतले. धुंवर आनी वखद मारपाची जापसालदारकी आता इमारतींनी रावपी लोकांची वा तांचे सोसायटीची आसतली. देखून हे विशींचे नवें विधेयक फुडले विधानसभेत हाडटले. उपरांत भलायकी आनी पालिके वयलो ताण उणो जातलो, अशें शार उदरगत मंत्री विश्वजित राणे हांणी सांगलें.
मंत्री राणे हांणी सगळ्या नगरपालिकेच्या मुखेल अधिकाऱ्यां वांगडा बसका घेतली. लोकांची समस्या कशी हाताळप हाचेर मार्गदर्शन केलें. तशेंच सगळ्या पालिकांची सेवा (टॅक्स, घरपट्टी फारीक करप आनी हेर) 15 दिसां भितर ऑनलायन करची अशें निर्देश सगळ्या मुखेल अधिकाऱ्यांक दिल्यात. 15 दिसा उपरांत पालिकेंत कसलेच अर्ज स्विकारचे नात, अशें मंत्र्यान सांगलें.
जे पालिका कर्मचारी सात वर्सां परस चड सेवेत आसात, तांकां सासणा खातीर सेवेत आस्पावन घेवपा विशींचो निर्णय घेतला आनी हे खातीर सर्व समावेशक प्रस्ताव तयार करतले. सरकारा कडल्यान पालिकेक येवपी निधीचो अजून वापर जावंक ना. ताचो वापर करपा खातीर पालिक मंडळाक विश्वासांत घेतले, अशें मंत्र्यान सांगलें.
उत्तर गोंयचे जीआयएस मॅपींग करप चालीक लागलां. जीं नवीं घरां आयल्यांत तांचें मुल्यांकन जावंक ना. हे खातीर नवीन तंत्रगिन्यान चालीक लावन नव्या घरांचें मॅपींग जाले उपरांत पालिकेचे येणावळींत वाड जातली, अशी म्हायती मंत्र्यान दिली. ते भायर पालिके खातीर मास्टर प्लॅन तयार करपाची गरज आसा. वाळपय आनी फोंडें पालिकेचो मास्टर प्लॅन तयार जाला. तशेंच म्हापशें आनी मुरगांव पालिकेचे मास्टर प्लॅन तयार करपाक हातांत घेतला, अशे राणें हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
