भांगरभूंय | प्रतिनिधी
पणजी ः स्ट्रीट लायट उबारपाक आनी दुरुस्ती करपा खातीर दरेका मतदारसंघांत वीज खात्याक एक स्काय लिफ्ट गाडी दितले अशी घोशणा मुख्यमंत्री डॉ. प्रमोद सावंत हांणी केला. बुधवारा मंत्रालयांतल्या वीज खात्या वतीन 38 स्काय लिफ्ट आनी 12 क्रेनींचे उक्तावण केलें. ह्या वेळार वीज मंत्री सुदीन ढवळीकार, आमदार जीत आरोलकार, मुखेल अभियंतो स्टीफन फर्नांडीस आनी हेर अधिकारी हाजीर आशिल्ले.
मुख्यमंत्र्यान दिल्ले म्हायती प्रमाण, सरकारान ह्या गाडयां खातीर एक पसून पयसो खर्च करूंक नात. गाडयांची पांच वर्सां खातीर देखरेख आनी दुरुस्ती कंत्राटदार स्वता करतले. कंत्राटदाराक पांच वर्सां खातीर 114 कोटी रुपया भाड्याच्या रुपांत दितले. फाटल्या पांच वर्सांत सरकारान फुडल्या 25 वर्सांचो विचार करून वीज खात्यात गुंतवणूक केल्या.
लायनमनांक दुरुस्ती वा हेर कामां करपाक खांब्यांचेर चडचें पडटा. अशें करतना लायनमनांक शॉक येवपाची शक्यताय आसता. हांचे आदीं असो दोन तीन घडणुकी घडल्यात. देखून तांचो जीव वाटावपाक स्कायलिफ्ट घेवपाचो निर्णय घेतिल्लो. स्काय लिफ्ट आनी क्रेनींत वेगळो बॉक्स आशिल्ल्यान लायनमनांक चड सुरक्षा मेळटली अशें मुख्यमंत्र्यान सांगलें.
स्कायलिस्ट घेवपाचो प्रस्ताव 2022 सावन प्रलंबीत आशिल्लो. वीज खात्यान स्वता गाडयो विकत्यो घेतिल्ल्यो जाल्यार खूब खर्च येवपाचो. ते भायर देखरेख आनी दुरुस्तीचो वेगळो खर्च जाता आशिल्लो. हाका लागून कंत्राटदाराचो पर्याय वेंचून काडलो. पुराय काम त्या त्या कंत्राटदाराचें आशिल्ल्यान त्याच दिसा काम पुराय करप सक्तीचें आसा. चवथी पयलीं स्ट्रीट लायटीच्या दुरुस्तीची कामां पुराय जातली अशें मंत्री ढवळीकार हांणी सांगलें.
त्यो कागाळी चड म्हत्वाच्यो ना…
मांद्र्यां दोंगर कापिल्ल्या खातीर पेडणें उपजिल्होधिकारी कार्यालयान वीज खात्याक कारण दाखोवपाची नोटीस जारी केल्या. हे विशीं ढवळीकार हांच्या म्हणण्या प्रमाण, तो प्रकल्प मनोहर पर्रीकार मुख्यमंत्री आसतना सुरू जाल्लो. खात्यान दोगर कापून प्लॉट तयार करूंक नात. हांगा पेडणें आनी मांद्र्यांच्या लोकांच्या बऱ्या खातीर काम चालू आसा. देखून अशो कागाळीं चड म्हत्वाच्यो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
