भांगरभूंय | प्रतिनिधी
पणजी, प्रतिनिधी : नीट परीक्षेचेर आदारीत अभ्यासक्रमाची प्रवेश प्रक्रीया 26 ऑगस्ट सावन सुरू जातली. प्रवेशाक पात्र आशिल्ल्या विद्यार्थ्यांची पात्रता वळेरी जाहीर जाल्या. गुणवत्ता वळेरी आयज वा फाल्या जाहीर जातली, अशी म्हायती गोपानी दिली. तांत्रिक शिक्षण संचालनालया वरवीं प्रवेशाच्यो फेरयो 26 ऑगस्ट सावन सुरू जातल्यो. 26 ऑगस्ट ते 31 ऑगस्ट मजगतीं एमबीबीएस, बीडीएस, आयुर्वेदीक, नर्सिंग प्रवेशा खातीरच्यो फेरयो जातल्यो. तांत्रिक शिक्षण संचालनालया कडल्यान ही म्हायती मेळ्ळ्या.
नीट अभ्यासक्रम प्रवेशा खातीर वट्ट 3500 अर्ज आयल्या. प्रवेशाक पात्र आशिल्ल्या विद्यार्थ्यांची वळेरी जाहीर जाल्या. वैजकी (एमबीबीएस), दंत (बीडीएस), होमिओपथी (बीएचएमएस), आयुर्वेदिक (बीएएमएस) आनी नर्सिंग (बीएससी) अभ्यासक्रमा खातीर नीट परीक्षेच्या आदाराचेर प्रवेश दिलो वता. एमबीबीएस प्रवेशाची फेरी सगळ्यात पयली जातली. अंदूं पेपर फुटीक लागून पुराय देश पांवड्यार बोवाळ जालो. बिहारांत हजारीबाग आनी पाटणा हांगा पेपर फुटीचे प्रकार घडले. प्रकरण सर्वोच्च न्यायालया मेरेन गेले. ही परीक्षा नॅशनल टेस्टिंग एजन्सी (एनटीए) घेता. अंदूं 5 मेंक देशभरांतल्या 4750 केंद्रांनी परीक्षा जाल्ली.
पेपर फुटीक लागून निकालाक कळाव जालो आनी प्रकरण सर्वोच्च न्यायालयात पावले. निमाणे 26 जुलयाक एनटीएन सुधारीत गुणपत्रिका जारी केली. ह्या गुणांच्या आदाराचेर प्रवेश जातलो.
गोंय विधानसभेंत सुद्दा नीट आदारीत प्रवेशाचेर चर्चा जाली. एमबीबीएस, बीडीएस, बीएएमएस अभ्यासक्रमाक हुशार विद्यार्थी वता. पेपर फुटीक लागून इत्सुक विद्यार्थी तशेंच तांचे पालकां मदीं हुस्को निर्माण जाला, अशें मत आमदारांनी उक्तायलें. हो प्रस्न गोंय सरकाराच्या अखत्यारीत ना. पेपर फुटीक लागून पुराय देश पांवड्यार घोळ निर्माण जाला. सर्वोच्च न्यायालयान आनी केंद्र सरकाराच्या आदेशा प्रमाण प्रवेशाची प्रक्रिया जातली. फुडल्या वर्सा नीट परीक्षा घेवपी एनटीए जतनाय घेतली, अशें मुख्यमंत्री डॉ. प्रमोद सावंत हांणी सभाघरांत स्पश्ट केल्लें.
आता 26 ऑगस्ट सावन प्रवेशा खातीरच्यो फेरयो जावपाचें निश्चित जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
