भांगरभूंय | प्रतिनिधी
150 आपमजत गटां सयत 21 शिक्षण संस्था घेतल्यो वांटो
पणजी : रानभाजयांची वळख आनी म्हत्व पटोवन दिवपी राज्य पांवड्या वेलो रानभाजी महोत्सव 27 ऑगस्टाक काणकोणां रवींद्र भवनांत जातलो. बलराम चॅरिटेबल ट्रस्टान महोत्सवाचें आयोजन केलां. सभापती रमेश तवडकार हांणी पत्रकार परिशदेंत ही म्हायती दिली. ह्या वेळार बलराम चॅरिटेबल ट्रस्टाचे वांगडी संतोष लोलयेंकार हाजीर आसले.
मुख्यमंत्री डॉ. प्रमोद सावंत हांचें हस्तुकीं रानभाजी महोत्सवाचें सकाळीं 9.30 वरांचेर उक्तावण जातलें. ह्या वेळार राज्याचे पर्यावरण मंत्री अालेक्स सिक्वेरा हाजीर आसतले. महोत्सवांत 150 आपमजत गटां सयत 21 शिक्षण संस्था वांटो घेतल्यो. रानभाजयांचें प्रदर्शन, खावपाचे पदार्थ, पथनाट्य सर्त अश्यो तरेकवार कार्यावळी महोत्सवांत जातल्यो. नाशीक हांगाचे चैत्राम पवार हांणी रानभाजयांच्या वाठारांत मोटो वावर केला. तांची मुलाखत महोत्सवांत जातली. तशेंच रानभाजयांची म्हायती दिवपी डॉक्युमेंटरी प्रदर्शीत जातली.
दिसानदीस रान भाजयांचें प्रमाण उणें जायत आसा. तरी लेगीत कांय जाण रानभाजयांची जतनाय घेतात. लागवड सुद्दा करतात. रानभाजयांचें ज्ञान मेळचें आनी तांकां उर्बा मेळची, हो महोत्सवा फाटलो हेत आसा, अशें सभापती रमेश तवडकार हांणी सांगलें. एक आपमजत गट 20 प्रकारचे खावपाचे पदार्थ हाडटलो. हाका लागून भाजयां सयत परंपरीक खाद्य पदार्थ खावपाची संद उपस्थितांक मेळटली.
रानभाजयांचेर आधारीत पथनाट्य 21 शिक्षण संस्थांनी तयार केलां. सगल्या विद्यालयांनी पथनाट्याचे सादरीकरण सुरू आसा. मडगांव, फोंडें, पेडणें तशेंच हेर वाठारांतल्या विद्यालयांनी पथनाट्याचें सादरीकरण सुरू आसा, अशी म्हायती सभापती रमेश तवडकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
