खांपो चोर आगुस्तीन कार्व्हालोक गोकर्णा अटक

भांगरभूंय | प्रतिनिधी

दर्यादेगेर जगतालो ऐशआराम जीण; 20 गुन्यांवांनी पुलीस घेताले सोद

कारवार, म्हापशें: गोंयांत खूबश्या चोरयांचे गुन्यांव नोंद आशिल्लो खांपो चोर आगुस्तीन झेवियर कार्व्हालो (30, रा. माजोड्डें, साश्टी) हाका गोकर्णा (कर्नाटक) पर्वरी पुलिसांनी शिताफीन अटक केली. दुबावीत आगुस्तीन हो चोरयेच्या पयशांतल्यान गोकर्णा दर्यादेगेर ऐशआराम करतालो. दुबाविताक 25 गुन्यांवांनी हाचे पयलीं अटक जाल्या. जाल्यार अजून अदमामशेक 20 प्रकरणांत चड करून भांगराची सरपळी झोमून व्हरपाच्या गुन्यांवांनी ताचो पुलीस सोद घेताले.

सोमारा 19 वेर रातच्या 9.30 वरांच्या सुमाराक उपनिरिक्षक मंदार परब, हवालदार विनय श्रीवास्तव, काँन्सटेबल दिपेश कोमरपंत आनी साक्षी परब ह्या पंगडान दुबाविताक अटक केली. ह्या पंगडान दुबावीत गोकर्णा रावत आशिल्ले भाड्याचे कुडीचेर धाड घाली. आपलो सोद घेत गोंय पुलीस पाविल्ल्याची सुलूस लागतकच ताणें कुडीच्या फाटल्या दारांतल्यान शेतांत पळ काडलो. वयल्या पंगडान ताचो फाटलाग करून ताका धरलो.

ह्या पंगडान गोकर्ण शार पुलीस स्टेशनाक हे विशींची म्हायती दिली आनी दुबाविताक घेवन हो पंगड पर्वरे फांतोडेर दाखल जालो. उपरांत दुबाविताक पुलिसांनी भांगराची सरपळी झोमून व्हरपाच्या गुन्यांवांत रितसर अटक केली.

सुकूर पर्वरे फाटल्या 4 ऑगस्ट दिसा सकाळीं 7.30 वरांचेर भांगराची सरपळी झोमून व्हरपाची घडणूक घडिल्ली. कागाळदार जाण्टी बायल घरच्या आंगणांत फुलां काडटाली. ह्या वेळार तांबड्या रंगाचे दुचाकी वेल्यान तरणाटो-तरणाटी आयली आनी कागाळदार बायले कडेन नामो विचारपा कडेन गुथोवन तिच्या गळ्यांतली 1.20 हजाराची भांगराची सरपळी झोमून व्हेल्ली.

असोच भांगराची सरपळी झोमून व्हरपाचो प्रकार 3 ऑगस्ट दिसा सकाळीं 7.45 वरांच्या सुमाराक धामाडें थिये हांगा घडिल्लो. पणजे सावन कागाळदहार जाण्टी बायल आपले चलये कडेन आयिल्ली. ती चलत चलयेच्या घरा वता आसतना दुचाकी चालकान तिच्या गळ्यांतली 40 हजारांची भांगराची सरपळी झोमून व्हेल्ली.

ह्या दोनूय घडणुके उपरांत आनी कोलवाळ पुलीस दुबावीत दुचाकी चालकांचो सोद घेताले. सुकूर आनी पर्वरी वाठारांतले सीसीटीव्ही फुटेजींत दुबावीत दुचाकी चालकाचो चेरो बंदिस्त जाल्लो. हे फुटेजी प्रमाण ही चोरी दुबावीत आगुस्तीन कार्व्हालो हाणेंच केल्ल्याचें दिसून आयिल्लें.

ताका लागून पर्वरी पुलीस दुबाविताच्या मागार आशिल्ले. दुबावीत आगुस्तीन हो गोकर्णा आशिल्ल्याची म्हायती पुलिसांक मेळटकच वयलो पुलीस पंगड गोकर्णा दाखल जालो आनी तांणी दुबाविताक अटक केली. वयली चोरी करतना दुबाविता सयत एक तरणाटी आशिल्ली. ताका लागून ते तरणाटीचो सोद पुलीस घेतात.

उत्तर गोंय पुलीस अधिक्षक अक्षत कौशल, उपअधिक्षक विश्वेश कर्पे आनी निरिक्षक राहूल परब हांच्या मार्गदर्शना खाला उपनिरिक्षक प्रतीक तुळसकार फुडलो तपास करतात.

दुबावीत आगुस्टीन कार्व्हालो हो खांपो चोर आसून गोंयांत बायलांच्या गळ्यांतल्यो भांगराच्यो सरपळी फारावपा सयत हेर चोरयांनी सुमार 25 गुन्यांव दुबाविता आड नोंद आसात. तशेंच अजून 20 परस चड अशाच गुन्यांवांनी दुबाविताचो आस्पाव आशिल्ल्याचो दुबाव पुलिसांक आसा. गोंयांत चोरी केले उपरांत तातूंतल्यान मेळिल्ल्या पयशांतल्यान गोकर्ण आनी कर्नाटकांतल्या हेर वाठारांनी वचून तो ऐशआराम करतालो.