भांगरभूंय | प्रतिनिधी
संजीव वेरेंकार हांचे यादीक ओंपिल्लें कवी संमेलन दबाज्यान
पणजी: सर्गेस्त संजीव वेरेंकार आपल्या कवितेंतल्यान सदांच समाजीक संवेदनां मांडटालो. हुबेहूब प्रतिकां आनी प्रतिमा वापरून मार्मीक पद्दतीन मनीसपणाचो वैश्वीक विचार दिवपी तांची कविता आसताली. कोंकणीत तांणी आपली अशी खाशेली शैली विकसीत केल्ली अशें कार्यावळीचे अध्यक्ष जेश्ठ कवी उदय म्हांबरो हांणी सांगलें.
केंद्रीय साहित्य अकादेमी पुरस्कार प्राप्त कवी आनी लेखक सर्गेस्त संजीव वेरेंकार हांचे यादीक ओंपिल्ले कवितांचें कार्यावळींत ते मुखेल सोयरे ह्या नात्यान पणजे गोवा कोंकणी अकादेमीच्या शणै गोंयबाब सभाघरांत उलयताले.
ह्या वेळार गोवा कोंकणी अकादेमीचे प्रभारी अध्यक्ष वसंत सावंत, तशेंच गोमंतक मराठा समाज तिसवाडी म्हाल समितीच्यो अध्यक्ष सुनिता पेडणेंकार, सल्लागार रोहिदास नायक हाजीर आसले.
गोमंतक मराठा समाज शतक महोत्सवा निमतान गो.म.स. तिसवाडी म्हाल समितीन ही कार्यावळ आयोजीत केल्ली. कवी संमेलनाचें सुत्रनिवेदन कवियत्री नयना आडारकार हांणी केलें.
ह्या काव्य सांजेक कवी महादेव गांवकार, शोभा फुलकार, अॅनी दी कोलवाळे, चंद्रिका पाडगांवकार, नयना आडारकार, मुकूंद मुळगांवकार, राजू नायक, अनघा कामत, महेश पारकार, मोहिनी हरमलकार, सरस्वती नायक, नागरत्ना कुडतरकार, सुनील पालकार, श्रध्दा नायक, शितल साळगांवकार, नूतन दाभोलकार, शिला काकोडकार, निता कुट्टीकार, विशाल गांवस, बबिता नार्वेंकर, नामदेव सुर्लीकार, सुनिता पेडणेंकार, अशोक लोटलीकार, विंंदा नायक, अॅना फेरेरा अशा वट्ट 25 कवींनी आपल्यो आनी संजीवाच्यो कविता सादर केल्यो.
वांटो घेतिल्ल्या सगल्या कवींक मानेस्तां हस्तुकीं सन्मान चिन्न भेटयलें.
रोहिदास नायक हांणी उपकार मानले. कार्यावळ येसस्वी करपाक गोमंतक मराठा समाज केंद्रीय समितीचे अध्यक्ष कालीदास खांडेपारकार हांचे मार्गदर्शन लाभलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
