भांगरभूंय | प्रतिनिधी
नवी दिल्ली, खबरां संस्था: सरन्यायाधीश डी वाय चंद्रचूड हांचे अध्यक्षते खाला तीन न्यायाधीशांच्या खंडपीठान कोलकाताच्या आर जी कर मेडिकल कॉलेज आनी हॉस्पिटलांत प्रशिक्षणार्थी दोतोराच्या बलात्कार आनी खुना विशीं खर हुस्को उक्तायलो. दोतोरां खातीर कामाच्या सुवातांचेर सुरक्षितताये खातीर कार्यपद्धती तयार करपा खातीर ९ वांगडी कृती दळाची स्थापना करपाचोय आदेश दिलो.
ह्या वेळार सर्वोच्च न्यायालयान पश्चीम बंगाल सरकाराकूय सोलून काडलें. पोस्टमार्टम रिपोर्ट आयलो तरी गुन्यांव नोंद करपाक उशीर कित्याक, असोय प्रस्न हाजीर केलो. अस्तंत बंगालाक आर जी कर हॉस्पिटलाचेर गर्देन केल्ल्या हल्ल्याचे चवकशेच्या अपडेटी विशीं आनी बलात्कार-खून प्रकरणांतल्या तपासाचो स्टेटस रिपोर्ट २२ ऑगस्टा मेरेन सादर करपाचे निर्देश दिले.
सर्वोच्च न्यायालयान दोतोरांच्या कामाचे सुवातेर तांचे सुरक्षे खातीर कार्यपद्धती सुचोवण्यां खातीर तांच्या अधिकारां खाला कृती दळाची स्थापना केल्या. हातूंत विंगड विंगड फाटभूंयेचे दोतोर आसतले, जे पुराय भारतांत वापरपाच्यो पद्धती सुचयतले. जाका लागून कामाचे सुवातेर सुरक्षा आसतली आनी तरणाटे दोतोर तांच्या कामाच्या वेळार सुरक्षीत आसतले, अशें चंद्रचूड हांणी म्हणलें.
राष्ट्रीय कृती दळांत कोण आसतले?
सर्जन आर सरीन, डॉ. डी नागेश्वर रेड्डी, डॉ. एम श्रीनिवास, डॉ. प्रतिमा मूर्ती, डॉ. गोवर्धन दत्त पुरी, डॉ. सौमित्र रावत, प्रा. अनिता सक्सेना, मुखेली कार्डिओलॉजी, एम्स दिल्ली, प्रा. पल्लवी सप्रे, डीन ग्रँट मेडिकल कॉलेज मुंबय, डॉ. पद्मा श्रीवास्तव, न्युरोलॉजी विभाग, एम्स हांचो ह्या कृती दळांत आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
