भांगरभूंय | प्रतिनिधी
कोंकणी अकादेमीन मनयलो ‘कोंकणी राष्ट्रमान्यताय दीस’
पणजी, प्रतिनिधी: तरणाटे साहित्यीक फेसबुकांचेर आपलें साहीत्य घालतात. फेसबुकार लायक मेळटकच ते खूश जातात. पुण तांतूतल्यो चुको मान्य करपाक ते तयार नासतात. ह्या साहित्यकारांक तयार करपा खातीर मेळावे घेवन म्हालगड्यां कडल्यान मार्गदर्शन दिवप गरजेचें, अशे साहीत्य अकादेमी पुरस्कार जैतिवंत साहित्यकार माया खरंगटे हांणी सांगलें.
गोंय कोंकणी अकादेमीन पणजे शणै गोंयबाब सभाघरांत 32 वो कोंकणी राज्यमान्यताय दिस मनयलो. मुखेल सोयरी म्हूण माया खरंगटे उलयताली. ह्या वेळार अकादमीचे अध्यक्ष वसंत सामंत, कवयित्री नयना आडारकार, लेखक वालंका रिबेलो आनी हेर मानेस्त हजर आशिल्ले. ह्या दिसा निमतान 8 वी ते 10 वी मेरेनच्या विद्यार्थ्यां खातीर अखील गोंय प्रश्नमाची सर्त घडोवन हाडली. गोंय, भुगोल, कोंकणी, इतिहास आनी संस्कृतीक दायज हे सर्तींचो विशय आशिल्लो.
सुमार 40 ते 50 वर्सां पयलीं आमच्या वेळार गोंयांत आशिल्ल्या कोंकणीच्यो खूबश्यो संस्था वर्सांक 1- 2 तरी मेळावे घेताल्योच. थंय म्हालगडे आमकां मार्गदर्शन करताले. गोंय कोंकणी अकादेमी स्थापन जाले उपरांत ही परंपरा चालू दवरून कथा आनी कवितेचेर शिबिरां घेतलीं. म्हालगड्यांचें मार्गदर्शन मेळ्ळें म्हूण आमी साहीत्य मळार नामना जोडपाक पावलीं, अशें खरंगटे हांणी सांगलें.
आयज खूब भुरगीं बरयतात, पूण तांकां मार्गदर्शन करपाक अशें तरेचे मेळावे नात. फक्त कोंकणी साहीत्य संमेलन आनी हेर कार्यावळी खूब उण्या प्रमाणात जातात. जे तरेन आमका म्हालगड्यां कडेन उलोवपाची संद मेळ्ळी तशें आतां घडना, अशी खंत खरंगटे हांणी उक्तायली.
आतांचे साहित्यकार आपलें साहीत्य फक्त ‘आंगठ्या’ खातीर फेसबुकार घालतात. लायक्स मेळ्ळें उपरांत स्वतःक बरे बरोवपी अशें समजतात. हे लायक बेश्टेच. खूब जाण तें साहीत्य वाचिनात. कोणी वाचल्यार ते फोन करून चुको सांगतात. पूण तांचे आयकुन घेवपाक लेखकांची तयारी नासता. उरफाटें तांकां वायट दिसता. ते खातीर मेळावे घेवप खूब गरजेचें, अशें खरंगटे हांणी सांगलें.
ह्या वेळार तरणाटी लेखिका वालंका रिबेलो हांचें ‘निर्णय आनी हेर काणयो’ हें पुस्तक मानेस्तांच्या हस्तुकीं उजवाडाक हाडलें. ह्या वेळार हेर मानेस्तांचीं उलोवपां जालीं. सुवाळ्याक साहित्यकार, साहित्य रसिक व्हड संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
