भांगरभूंय | प्रतिनिधी
मुंबय, खबरां संस्था : बदलापूरचे एके नामनेचे शाळेंत दोन भुरग्यांचेर लिंगीक अत्याचार जाल्ल्यान पुराय महाराष्ट्र तिडकला. सान पिरायेच्या दोन चलयांचेर आयिल्लो प्रसंग आयकून बदलापूरांतल्या लोकांक धक्को बसला. भुरग्यांक न्याय मेळोवन दिवपा खातीर लोक रस्त्यार देंवल्यात. गुन्यांवकाराक फांसार चडोवचो असो एकूच सुर लोकांनी उक्तायला. मुख्यमंत्री एकनाथ शिंदे हांणी ही केश ‘फास्ट ट्रॅका’चेर चलोवपाचें उतर दिलां. आरोपीक खर ख्यास्त दितले अशेंय सांगलां. पूण बदलपुरांतल्या लोकांची तिडक उणी जावंक ना. शाळे भायर नागरिकांनी निशेध केलोच, रेल्वेय आडयली. ह्या प्रकरणांत शाळेन चूक मागल्या. शाळेच्या मुख्याध्यापकाक निलंबीत केला. भुरग्यांची जापसालदारकी आशिल्ल्या दोग सेविकांक नोकरेंतल्यान काडल्यांत.
त्या दिसा नेमकें कितें घडलें?
शाळेंत नितळसाण करपी अक्षय शिंदे ह्या २३ वर्सांच्या कामगारान दोग नेण्ट्या चलयांचेर लिंगीक अत्याचार केलो. आरोपीक अटक केल्या. गुन्यांव दाखल करपाक कळाव करपी पुलिसांचेरूय कारवाय जाल्या. ही घडणूक उजवाडाक आयले उपरांत पालक भडकले. प्रसार माध्यमांनी दिल्ले म्हायती प्रमाण, हातुंतलें एकलें चली चार वर्सां पिरायेचें जाल्यार दुसरें स वर्सांचें. ही घडणूक १२ ऑगस्टाक घडली. सकाळी वरग सुरू आसतना ही घडणूक घडली.
अक्षय शिंदे १ ऑगस्टाक बदलापूरांतले ते शाळेंत कंत्राटी पद्दतीन भरती जालो. चलयांचें शौचालय निवळ करपी आरोपीन कामाचो गैरफायदो घेवन हें कृत्य केलें. मजगतीं, चलयांचे शौचालय नितळ करपा खातीर शाळेंत कोणूच बायल कामगार नेमूंक ना.
१२ ऑगस्टाक एके चलयेन शाळेंतल्यान घरा परतले उपरांत आवय- बापाय कडेन कागाळ केली. तांणी आपले आवय म्हणलें, ‘‘आई म्हाका सुसू करपाच्या जाग्यार मुयो चावतात.’’ ते चलयेक तिचे वांगडा कितें घडलें हें लेगीत समजूंक ना… ती चली आवय-बापाय कडेन सतत कागाळ करताली तेन्ना तांकां दुबाव आयलो. तांणी चलयेक विस्वासांत घेवन चवकशी केली, तेन्ना ही घडणूक उक्ती जाली. ती संडासांत वतना अक्षयान तिच्या गुप्त भागांक हात लायिल्ल्याचें कळ्ळें. संबंदीत पालकांनी त्याच वर्गांतल्या दुसर्या चलयेच्या पालकां कडेन संपर्क केलो. तांची धूवय शाळेंत वचपाक भियेता, अशें तांणी सांगलें. दोनूय चलयांची स्थिती पळोवन पालकांनी रोखडेंच थळाव्या दोतोरा कडेन तपासपाचें थारायलें. चवकशे उपरांत दुबावितान त्या दोगांयचेर लिंगीक अत्याचार केल्ल्याचें समजलें.
पुलिसांनी केस दाबपाचो केलो यत्न
तिडकल्ल्या पालकांनी बदलापूर उदेंत पुलीस स्टेशनाचेर समाजसेवकांच्या आदारान कागाळ दाखल केली. पूण पोक्सो प्रकरण आसून लेगीत हे प्रक्रियेक कळाव केल्ल्याचो आरोप वरिश्ठ पुलीस निरिक्षक शुभदा शितोळेचेर आसा. निमाणे शुक्रारा रातीं उसरां ह्या प्रकरणांत गुन्यांव नोंद केलो. भुरग्यांचेर अत्त्याचार करपी दुबाविताक अटक केली. पुलिसांच्या म्हणण्या प्रमाण, लिंगीक गुन्यांवांतल्यान भुरग्यांची राखण करपी कायदो आनी भारतीय दंड संहिता (बीएनएस) कायद्या खाला गुन्यांव नोंद केला.
शाळा वेवस्थापनाचीय आडनदर
पुलिसांच्या चवकशेंत शाळा वेवस्थापनान हाचे कडेन आडनदर केल्ल्याचें कळ्ळां. चलयांच्या वॉशरूमांत बायल कामगारांचो उणाव सोडल्यार, शाळेंतले जायते सीसीटीव्ही कॅमेरेय काम करीनात, अशें पालकांनी सांगलें. फुडाराक अशी घडणूक घडची न्हय हे खातीर चड खर उपाय काडपाची मागणी पालक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
