भांगरभूंय | प्रतिनिधी
कोलकाता, खबरां संस्था: कोलकातांतल्या आर. जी. कर मेडिकल कॉलेजीतले बायल दोतोराचेर बलात्कार करुन तिचो खून केलो. ह्या घडणुकेचो देशभरांतल्यान निशेध करतात. ह्या प्रकरणांत संजय रॉय हाका अटक केल्या. हाचे उपरांत ह्या प्रकरणा संबंदीत आतां दर दिसा नव्यो गजाली भायर सरपाक लागल्यात. आतां संजोय रॉय हो विकृत वृत्तीचो मनीस आशिल्लो आनी तो दर दिसा म्हजे धुवेक मारतालो अशी म्हायती ताचे मांयन दिल्या. एएनआयक दिल्ले मुलाखतींत संजय रॉय तिच्या धूवे कडेन कशी वागणुक करतालो हेंय तिणें सांगलां.
मांयन सांगलें….
संजय रॉय आनी म्हजे धुवेच्या लग्नाक दोन वर्सां जालीं. पूण तो म्हज्या धुवेक सदां मारतालो. तिका सुखान जगपाक दिनाशिल्लो. तिका मारपाक लागून तिचो गर्भपातूय जालो. त्या वेळार म्हजी धूव तीन म्हयने गुरवार आशिल्ली. आमी पुलिसां कडेन कागाळ केली. ते उपरांत पुलिसांनी कागाळ नोंद केली. संजोय रॉय हांचे कडेन म्हजे संबंद मात्तूय बरे नाशिल्ले. कारण तो म्हज्या धुवेक सदांच त्रास दितालो अशें संजय रॉयच्या सासून मुलाखतींत सांगलें.
संजय रॉयक फांशी दिल्यारुय जाता…
संजय रॉय हाचे आदीं एक लग्न जाल्लें. ताणें त्या बायलेक रीतसर घटस्फोट दिलो. आनी उपरांत म्हज्या धुवे कडेन ताचे लग्न जाले. ताच्यो भयणी पुलीस दळांत आसात. तीय तेन्ना आयली. ताची सगली चवकशी केले उपरांतच आमी आमच्या धुवेचे लग्न ताचे कडेन करुन दिलें. ते उपरांत स म्हयने सगळें बरें चलतालें. पूण, मागीर तो तिका सद्दां मारतालो. तिचो गर्भपात जाले उपरांत ती दुयेंत पडली. ते उपरांत ती म्हज्या घरा रावपाक आयली. थंयच तिका दुयेंसाक लागून मरण आयलें. ताका फांशी दियात वा कितेंय करात, आमकां कांयच फरक पडना. पूण, ताका ख्यास्त ही जावपाकूच जाय अशें ताच्या मांयन स्पश्ट सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
