भांगरभूंय | प्रतिनिधी
पणजी ः गोंय वैजकी म्हाविद्यालय (जीएमसी) आनी राज्यांतल्या हेर हॉस्पिटलांतल्या बायल दोतोरांचो समस्या सोडोवपा खातीर स्वतंत्र बायल दोतोरांची नेमणूक करपाची घोशणा भलायकी मंत्री विश्वजीत राणे हांणी केल्या. रेसिडेन्सी दोतोरा खातीरुय दोतोराची नेमणूक जातली. जीएमसी वाठारांतल्या सुरक्षे संबंदी गोंय असोसिएशन ऑफ रेसिडेंट दोतोर (गार्ड) संघटनेच्यो सगळ्यो मागणी पुराय करतले. हे संबंदी मुख्यमंत्री डॉ. प्रमोद सावंत हांचे सयत मंत्रीमंडळ बसकेंत चर्चा करतले अशें तांणी सांगलें.
कोलकाता घडणुकेचो निशेध करपी दोतोर गार्ड असोसिएशनाच्या शिश्टमंडळान म्हाका मेळून आपल्यो मागण्यो सांगल्यात, अशें राणे हांणी सांगलें. तातूंत मुखेलपणान सीसीटीव्ही कॅमेरे लावप, रातच्या वेळार उसरां मेरेन काम करपी दोतोरां खातीर स्वतंत्र सुरक्षा रक्षक नेमप, काळखांतल्या वाठारांनी दिवे लावप, दुयेंतींक मेळपाक येवपी लोकांक वेगळे पास दिवप, दोतोरांच्या कामाची म्हायती संगणकीय करप आदी मागण्यांचो तांतूत आस्पाव आसा. मुख्यमंत्र्याक पत्र बरोवन हे विशीं कळयतले. तशेंच मंत्रीमंडळ बसकेंतूय सगल्या मंत्र्यांनी हे विशीं चर्चा करप गरजेचें आसा अशेंय तांणी सांगलें.
भलायकी तशेंच महिला आनी बालकल्याण मंत्री म्हूण बायलांची सुरक्षीतताय ही म्हजीय जापसालदारकी आसा अशें तांणी सांगलें. राज्यांतल्या बायल दोतोरांच्या सुरक्षेक आमी प्राधान्य दितात. हे बाबतींत कसलीच तडजोड जावची ना. दोतोरांच्या सुरक्षे संबंदींचो कायदो खरपणान लागू जातलो. निशेध करपी दोतोरांक आमी पुराय तेंको दितात. कोलकाता सारकी परिस्थिती गोंयांत जावची न्हय हे खातीर आमी सगळे उपाय करपाचे आसात.
कोलकातांतले घडणुकेचें राजकारण…
कोलकातांत घडिल्ली घडणूक धक्को दिवपी आसा. थंयसरली मुख्यमंत्री बायल आसली तरी ती लोकांची भावना समजूंक शकना. आयज कोलकातांत दोतोर रस्त्यार देंवले. पूण अस्तंत बंगालाची मुख्यमंत्री हाचेंय राजकारण करता अशी टिका मंत्री राणे हांणी केल्या.
आज पांच वरांचेर निर्णय…
मजगतीं, भलायकी मंत्री राणे आमच्यो मागणी पुराय करतले असो आमकां विस्वास आसा. जीएमसींत चालू आशिल्लें आंदोलन फाटीं घेवपा संबंदी आयज सांजवेळार पांच वरांचेर निमाणो निर्णय जातलो. आंदोलन फाटीं घेतले तरी आमी वेगवेगळ्यां तरांनी निशेध करतले अशें गार्ड असोसिएशनाच्या शिश्टमंडळान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
