भांगरभूंय | प्रतिनिधी
पणजी, प्रतिनिधी ः गोंय शालांत मंडळाचे 10 वी आनी 12 वेच्या परिक्षांच्यो तारखो जाहीर जाल्यात. 12 वेची परिक्षा 1 फेब्रुवारी जाल्यार 10 वेची परिक्षा 1 मार्च 2025 सावन सुरू जातली. ह्यो तात्पुरत्यो तारखो आसात.
गोंय शालांत मंडळान दिल्ले म्हायती प्रमाण, 10 वी यत्ते खातीर सामान्य विशयांत शेनवार 1 मार्च सावन परिक्षा सुरू जातली. जाल्यार प्रॅक्टीकल परिक्षे खातीर एनएसक्युएफ विशयांत परिक्षा 4 फेब्रुवारी सावन सुरू जातली. विज्ञान, इतिहास आनी भुगोलाची परिक्षा 1 फेब्रुवारी सुरू जातली आनी विशेश विशयां खातीरची परिक्षा 13 फेब्रुवारी सावन सुरू जातली.
मजगतीं 12 वेची थियरी परिक्षा 1 फेब्रुवारी सावन सुरू जातली. प्रॅक्टीकल परिक्षा 8 जानेवारीक सुरू जातली. 8 जानेवारीक व्होकेशन कोर्सांचे ऑडीट जातलें आनी 10 जानेवारीक एनएसक्युएफ प्रॅक्टीकल सुरू जातलें.
10 वी आनी 12 वेचे परिक्षेक बसपाक ऑनलायन शुल्क भरून अर्ज करपाची प्रक्रिया 1 ऑक्टोबर 2024 सावन शालांत मंडळाच्या वेबसायटीचेर सुरु जातली. परिक्षा दिवप्यांनी 19 ऑक्टोबर मेरेन अर्ज करून शुल्क भरचें. ताचे उपरांत तांकां लेट फी भरची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
