आर जी कर हॉस्पिटलाचो काळो इतिहास
भांगरभूंय | प्रतिनिधी
दोतोर, कर्मचारी, विद्यार्थ्यांचें गूढ मरण, आत्महत्या
कोलकाता, खबरां संस्था : कोलकाताच्या आर. जी. कर वैजकी म्हाविद्यालय आनी हॉस्पिटलांत एके बायल दोतोराचेर बलात्कार जालो. मागीर तिका जिवेशीं मारली. हे घडणुके आड अजून देशभरांत निदर्शनां जायत आसात. आतां आर. जी. कर महाविद्यालय आनी हाॅस्पिटलाचो काळो इतिहास मुखार आयला. डीएनए खबरां वेबसायटीन हे विशींची खबर दिल्या.
९ ऑगस्टाक नेमकें जालें कितें?
९ ऑगस्टाक सकाळीं ही ३१ वर्सां पिरायेची दोतोर हाॅस्पिटलाच्या सेमिनार हॉलांत मेल्ली मेळ्ळी. तिची कुड अर्धनग्न अवस्थेंत आशिल्ली. पोस्ट मार्टमा उपरांत तिचेर बलात्कार जाला अशें कळ्ळें. तिचे कुडीर, गुप्तभागांचेर घावे आशिल्ले. दोळ्यांतल्यान रक्त व्हांवतालें, अशीय म्हायती सामकार आयली. बलात्कार करून तिका जिवेशीं मारिल्ली. ह्या प्रकरणांत दुबावीत संजय राॅय हाका अटक केल्या.
फाटल्या २३ वर्सांत असल्यो जायत्यो घडणुको घडल्यात. ताका लागून हें म्हाविद्यालय वादांत सांपडलां. कांय केशींचेर अजून तपास जावंक ना.
२००१ तलें सौमित्र बिस्वास प्रकरण
२००१ ते वैजकी शिक्षण घेवपी सौमित्र बिस्वास हाची कूड आर. जी. कर महाविद्यालयात मेळिल्ली. कुशीकूच आशिल्ल्या हाॅस्टेलांत फास लायिल्ले अवस्थेंत तो सांपडिल्लो. इश्टांनी, वांगडी दोतोरांनी, आवयन ताची हत्या केल्या असो आरोप केल्लो. पोर्नोग्राफी कडेन संबंदीत रॅकेट हांगा आसा, हें म्हज्या पुताक कळिल्लें, ताका लागून ताका मारलो, असो आरोप सौमित्राचे आवयन केल्लो. ह्या प्रकरणा भोंवतणचे गूढ अजून कायम आसा.
२००१ त इंटर्नाक मरण
२००१ त आर. जी. कर महाविद्यालयात एका इंटर्न दोतोराची कूड मेळिल्ली. ताणें अँटी डिप्रेशनाचो ओव्हरडोस घेतिल्ल्यान मरण आयलें, अशें कारण तेन्ना सामकार आयिल्लें. सादारण तो स म्हयने हें वखद घेतालो. तो तें कित्याक घेतालो, ताका कसलो तणाव आशिल्लो हाच्यो जापो अजून कळूंक नात.
२००३ त आत्महत्येचें प्रकरण
२००३ त आर. जी. कर महाविद्यालय हाॅस्पिटलांत एका कर्मचाऱ्यान आत्महत्या केली. तो आपले भितरूच ओग्गी आसतालो. ताणें तेर्रेसा वयल्यान उडी मारून जीव दिलो. ताचे पयलीं ताणें हाताची शीर कापिल्ली. लोकांनी वेगवेगळे दुबाव उक्तायिल्ले. पूण ती हत्या काय आत्महत्या तें अजून कळूंक ना.
२०१६ त प्राध्यापकाक मरण
२०१६ त आर. जी. कर वैद्यकीय महाविद्यालयांत शिकोवपी गौतम पाल ह्या प्राध्यापकाची कूड ताच्या घरांत मेळ्ळी. दुर्गंध येतकच तांकां मरण आयलां तें शेजाऱ्यांक कळ्ळें आनी तांणी पुलिसांक आपयले. तांच्या मुखामळाचेर घावे आशिल्ले. पुलिसांनी तांकां काळजाच्या आताकान मरण आयलां, अशें सांगलें. मात मुखार ह्या प्रकरणाचें कितें जालें, तें कळ्ळें ना.
पुलोमी सहा प्रकरण
आर. जी. कर महाविद्यालय पुलोमी सहा प्रकरणाक लागूनय चर्चेंत आयिल्लें. पुलोमी सहा ही ट्रेनी दोतोर. तिने २०२० त हाॅस्पिटलाच्या तेर्रेसा वयल्यान उडी मारून जीव दिल्लो. आत्महत्येचे कांय दीस पयलीं ती तणावाखाला आशिल्ली, अशें तिच्या वांगड्यांनी सांगलें. ह्या प्रकरणाचेंय मुखार कांय जालें ना.
हेंय वाचात–
कोलकाता दोतोर प्रकरणः संजय रॉयक फांशी दिली तरी आमकां फरक पडना…
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
