फोंड्यां अखिल गोंय घुमट आरती सर्त

भांगरभूंय | प्रतिनिधी

फोंडें, प्रतिनिधी ः हांगाच्या राजीव गांधी कला मंदिरा वतीन अखिल गोंय घुमट आरती सर्तीचे आयोजन केलां. सोळावे अखील गोंय दादलो घुमट आरती सर्तीची मुळावी फेरी 20 ते 21 सप्टेंबर ह्या काळांत घेतले. निमाणी फेरी 25 सप्टेंबराक जातली. पाचवी अखील गोंय महिला घुमट आरती सर्त 23 सप्टेंबराक जाल्यार तिसरी अखील गोंय बाल गट घुमट आरती सर्त 22 सप्टेंबराक आयोजीत केल्या. 11 सप्टेंबर मेरेन पंगडांचे अर्ज स्विकारतले, अशी म्हायती वांगडी सचीव स्वाती दळवी हांणी पत्रकार परिशदेंत दिल्या.
ह्या वेळार सुनील केरकार, श्रीकांत गावडे, दीपक नायक आनी उदय वेळीप हजर आशिल्ले.
प्राथमीक फेरयेंत उत्कृश्ठ तीन पंगडांक दरेकी 7000 रुपया दितले. निमाणे फेरयेंत पयलें इनाम 50 हजार रुपया, दुसरें इनाम 40 हजार रुपया आनी तिसरें इनाम 30 हजार रुपया अशें आसा. तशेंच दरेकी 10 हजार रुपयांची 3 उमेद वाडोवपी इनामां भेटयतले. उत्कृश्ठ घुमट, शामेळ, कांसाळें आनी गायन पंगडा खातीर दरेकी 5 हजार रुपयांचीं इनामां भेटयतले.
बायलां गटांच्या निमाणे सर्तींत पयलें इनाम 35 हजार रुपया, दुसरें 30 हजार रुपया आनी तिसरें 25 हजार रुपयांचें भेटयतले. सर्तींत दरेकी 10 हजार रुपयांचीं 3 उमेद वाडोवपी इनामां भेटयतले. तशेंच उत्कृश्ठ घुमट, शामेळ वादन, कांसाळें वादन आनी गायन पंगडा खातीर दरेकी 5 हजार रुपयांचीं इनामां भेटयतले.
बाल गट सर्ती खातीर पयलें इनाम 15 हजार रुपया, दुसरें 10 हजार रुपया, तिसरें 7 हजार रुपया आनी तशेंच दरेकी 5 हजार रुपयांचीं 3 उमेद वाडोवपी इनामां भेटयतले. उत्कृश्ठ घुमट, शामेळ, कांसाळें वादन आनी गायन पंगडा खातीर दरेकी 5 हजार रुपयांचीं इनामां भेटयतले.