भांगरभूंय | प्रतिनिधी
पावसाळो सुरू जातकच आमी सदचे परस उणें उदक पियेवंक लागतात. हवेंतली ओलसाण वाडटा तेन्ना पिवपाच्या उदकाचें प्रमाण आपोआप उणें जाता. मागीर थकपाक जाता, डिहायड्रेशनाक लागून तकली दुखप आनी घुंवळ येवप अशो जायत्यो समस्या निर्माण जातात. कुडींतलें उदक उणें जाल्ल्यान आनी पावसाच्या दिसांनी संसर्गजन्य दुयेंसांचे प्रमाण वाडिल्ल्यान मुतपाक हळडुवें जावपा वांगडाच कामिणी सारकिल्लीं दुयेंसांय वाडूंक लागतात.
कुडीक प्रथिनां आनी जीवनसत्वां वांगडा उदकाची गरज आसता. दीसभर उर्जा तिगोवन दवरपाक उदक पियेवप खूब गरजेचें. अमेरिकेच्या राष्ट्रीय विज्ञान अभियांत्रिकी आनी वखद संस्थेच्या म्हणण्या प्रमाण, प्रौढ बायलांनी दिसाक 11 पेले उदक पियेवचें. जाल्यार दादल्यांनी दर दिसा 15 पेले उदक पियेवपाची गरज आसा. आमी उदक उणें पियेल्यार आमची कूड वेगवेगळे संकेत दिता, समस्या निर्माण जाता जाचो भलायकेचेर परिणाम जावपाक शकता.
तोंड, कात, ओंठ सुकप
उदक उणे पियेल्यार तोंड सुकपाक लागता. तोंड सुकल्या उपरांत ताचो परिणाम कातीचेरूय जाता. कुडींत उदक उणे जाल्ल्याचे हें मुखेल लक्षण अशें जाणकार म्हणटात. खूब सोपणां चडल्या उपरांत वा थोडें चलल्या उपरांत तोंड सुकता. तशेंच कात सुकी पडटा आनी ओंठ सुकुन कात सोलपाचीय समस्या जाता तेन्ना रोखडेंच उदक पियेवचें.
हळडुवें मुतपाक जावप
आमी उदक उणें पियेल्यार आमच्या मुताचो रंग हळडुवो जावपाची समस्या जायत्या जाणांक जाता. दोतोरांच्या म्हणण्या प्रमाण हळदुव्या रंगाचें मुतपाक जावप म्हळ्यार कुडींक उदकाची चड गरज आसता.
तकली दुखप आनी घुंवळ येवप
उदक उणें पियेल्यार तकली दुखपा वांगडाच डिहायड्रेशनाक लागून चक्कर येवपाची समस्या वाडटा. उदकाच्या उणावाक लागून आमच्या मेंदवाक रगताची पुरवण बरी जायना. ताका लागून घुंवळ येता. वारंवार घुंवळ येता जाल्यार दोतोराचो सल्लो घेवप गरजेचें.
वारंवार थकप
कुडीत फावो त्या प्रमाणांत उदक ना हाचे थकवो येवप हें मुखेल लक्षण. कांय शारिरीक हालचाल केल्यार लेगीत रोखडोच थकवो येवपाक लागता. उदक उणें पियेवपाची संवय हें ताचे कारण अशें जाणकार सांगतात. उदक उणें पियेवप हें रगत उणें जावपाचें कारण अशें दोतोर सांगतात.
दोळ्यां सकयल डार्क सर्कल येवप
कुडींत फावो तितले उदक नासल्यार ताचो कातीचेर परिणाम जाता. पूण पयली तो दोळ्या सकयल दिसपाक लागता. फावो त्या प्रमाणांत उदक पियेल्यार दोळ्यां सकयल डार्क सर्कल येवप उणे जाता. ताण, चड वेळ स्क्रीनीचेर पळयल्यार दोळ्यां सकयल डार्क सर्कल जावंक शकतात. पूण उदक उणें पियेल्यारय कांय प्रमाणांत ही समस्या निर्माण जावंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
