भांगरभूंय | प्रतिनिधी
पाकिस्तान क्रिकेट मंडळ (पीसीबी) सध्या आयसीसी चॅम्पियन्स ट्रॉफीच्या आयोजनाची तयारी करपाक लागला. चॅम्पियन्स ट्रॉफी फुडल्या वर्सा फेब्रुवारी-मार्च म्हयन्यांत जातली. सर्ती खातीर पाकिस्तानांतल्या मैदानांचें अपग्रेड करप चालू आसा. कराची नॅशनल स्टेडियमाचेर चालू आशिल्ल्या नुतनीकरणाक लागून बांगलादेशा आडची टॅस्ट रावलपिंडी स्थलांतरीत केल्या.
सर्तीची तयारी चालू आसतना पीसीबीच्या अध्यक्ष मोहसीन नक्वी हांणी स्टेडियम पळोवन म्हत्वाचें विधान केलां.
हालींच लाहोरच्या गद्दाफी स्टेडियमाची पळोवणी केली. ते उपरांत एका खाजगी न्यूज चॅनलाक मुलाखत दितना म्हणलें, हेर देशांचे आंतरराष्ट्रीय पांवड्या वयल्या स्टेडियमाच्या आनी आमच्या स्टेडियमांनी खूब फरक आसा. पाकिस्तानांतलो एक लेगीत स्टेडियम आंतरराष्ट्रीय पांवड्या वयलो ना.
स्टेडियमांची सुदारणां करपाक कामगार खर मेहनत घेत आसात. आमी आमच्या क्रिकेट स्टेडियमांक आंतरराष्ट्रीय पांवड्या वयले करतले. स्टेडियमांत मुळाव्या सुविधांची पुरवण करप हें आमचें पयलें प्राधान्य आसा अशें तांणी मुखार म्हणलें.
बांगलादेशा आडची दुसरी टॅस्ट स्थलांतरीक केल्ले विशीं सांगलें, कराची नॅशनल स्टेडियमाचेंर बांदकाम चालू आसा. तें चालू आसतना मॅच खेळपाक शक्य आसलें. पूण, आवाज प्रदुशणाक लागून क्रिकेटरांक त्रास जावपाक शकता. तशेंच धूळ लेगीत खेळगड्यांचे, अधिकाऱ्यांचे आनी प्रसारकांचे भलायकीचेर परिणाम जावपाक शकता अशें ताणें मुखार म्हणलें.
चॅम्पियन्स ट्रॉफीचें येसस्वी रितीन आयोजन करपा खातीर बरे तरेन स्टेडियम तयार करपाक जाय. कराची नॅशनल स्टेडीयमाक आंतरराष्ट्रीय पांवड्या वयलो स्टेडीयम म्हणपाक जावचे ना. हातूंत बसपाक योग्य खुर्च्यो नाशिल्ल्यो आनी टॉयलेट नाशिल्ले. सध्या संवसार खूब बदल्ला अशें तांणी मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
