भांगरभूंय | प्रतिनिधी
सिद्धेश नायक आनी सुवर्णा तेंडुलकार हांचे राजिनामे मंजूर
पणजी : उत्तर गोंय जिल्लो पंचायतीचे अध्यक्ष सिद्धेश नायक आनी दक्षीण गोंय जिल्लो पंचायत अध्यक्ष सुवर्णा तेंडुलकार हांणी २ ऑगस्टाक दिल्ले राजिनामे पंचायत संचालक सिद्धी हळर्णकार हांणी सोमारा मंजूर केले. दोनूय जिल्लो पंचायतींच्या अध्यक्षपदां खातीर येत्या सोमारा वेंचणूक घेतले अशें हळर्णकार हांणी सांगलें.
जिल्लो पंचायतींच्या अध्यक्षांनी राजीनामे दिले उपरांत ते मंजूर करपा खातीर १५ दिवसांची मुजत आसता. ते प्रमाण सोमारा सिद्धेश आनी सुवर्णा हांचे राजिनामे मंजूर केल्यात, अशें हळर्णकार हांणी सांगलें.
दोनूय जिल्लो पंचायतींनी स्पश्ट भोवमत मेळ्ळ्या उपरांत भाजपान दोनूय जिल्लो पंचायतींच्या अध्यक्षांक दोन वर्सांच्या काळ दिवपाचो करार केल्लो. ते प्रमाण भाजप प्रदेशाध्यक्ष सदानंद शेट तानावडे हांणी जुलयाचे निमाणे कडेन दोनूय अध्यक्षांक राजीनामे दिवपाचे निर्देश जारी केल्ले. पक्षाच्या आदेशा प्रमाण दोनूय अध्यक्षांनी राजीनामे दिले. मात, अध्यक्षपद दितना पक्षान आपल्याक कालावधी सांगूंक नाशिल्लो. जिल्लो पंचायत अध्यक्षपदाक आपणें योग्य न्याय दिल्लो, अशी खंत अध्यक्षांनी उक्तायल्ली. नव्या अध्यक्षांची निवड जातांच पक्षा कडल्यान दोनूय जिल्लो पंचायतींच्या उपाध्यक्षांकूय राजीनामे दिवपाचे निर्देश दितले अशें भाजपाच्या सुत्रांनी पयलींच स्पश्ट केलां.
मजगतीं, उत्तर गोंय जिल्लो पंचायतीच्या अध्यक्षपदा खातीर पक्षा वतीन गिरीश उसकयकार आनी धाकू मडकयकार, जाल्यार दक्षीण गोंय जिल्लो पंचायतीच्या अध्यक्षपदा खातीर अनिता थोरात आनी संजना वेळीप हांचीं नांवां विचारांत घेतल्यांत, अशेंच सुत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
