भांगरभूंय | प्रतिनिधी
म्हापशें ः कुडाश्यां-दोडामार्गार तिळारी धरणाच्या कानालाक खावटें पडिल्ल्यान अस्नोडें आनी पर्वरी ह्या दोनूय उदका शु्द्धीकरण प्रकल्पांतल्यान उदकाची पुरवण बंद जाल्या. हाका लागून हो कानाल दुरुस्त जाय मेरेन पुराय बार्देस म्हालांत उदका पुरवणेच्या वेळापत्रकांत बदल जातलो.
शेनवारा १७ ऑगस्टाक भटवाडी- कुडाश्यां ह्या कानालाक खावटें पडून आशिकुशीकचीं शेतां उदका पोंदा गेल्लीं. हे विशीं कळ्ळे उपरांत तिळारी पाटबंधारे प्रकल्पाच्या अधिकार्यांनी ह्या कानालाची उदका पुरवण बंद केल्ली. ह्या कानाला वरवीं अस्नोडें आनी पर्वरेच्या उदका प्रकल्पाक उदकाची पुरवण जाता. मात खावटें पडिल्ल्यान ती बंद केल्या. देखून उदकाची समस्या निर्माण जाल्या. सध्या उदका स्रोत खात्यान अस्नोडें प्रकल्पाक पार न्हंयेंतल्या उदकाची जोडणी दिल्या. मात पर्वरे प्रकल्प पुरायेन तिळारी कानालाचेर निंबून आशिल्ल्यान ह्या प्रकल्पाचेर परिणाम जाला.
सोमारा सावन वयल्या कानालाचें उदक बंद केलां. ताका लागून हो कानाल दुरुस्त जायसर पुराय बार्देस म्हालांत नळा वरवीं जावपी उदका पुरवणेच्या वेळापत्रकांत बदल केला. सकाळींच उदकाची पुरवण जातली, अशें बांदकाम खात्याच्या उदका विभागान कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
