भांगरभूंय | प्रतिनिधी
‘मत्स्यवाहिनी’ आनी ‘मत्स्यआहार’ येवजण्यांचे उक्तावण
पणजी ः नुस्तेंमारीचो धंदो गोंयकारांच्या हातांतल्यान वच्चो न्हय म्हणून दरेका पंचायत वाठारांत एक गोंयकार वेवसायीक तयार जावप गरजेचें अशें मत मुख्यमंत्री डॉ. प्रमोद सावंत हांणी उक्तायलें. सोमारा नुस्तेमारी खात्यान आयोजीत केल्ल्या सुतापुनवेच्या कार्यावळींत ते उलयताले. ह्या वेळार नुस्तेंमारी मंत्री नीळकंठ हळर्णकार, संचालक डॉ. शमिला मोंतेरो, सचिव ई वल्लभन तशेंच पणजेचे महापौर रोहित मोन्सेरात आनी हेर अधिकारी हजर आशिल्लें. ह्या वेळार ‘मत्स्यवाहिनी’ आनी ‘मत्स्यआहार’ ह्या येवजण्यांचे उक्तावण केलें.
पयलीं नुस्तेंमारीचो धंदो फकत गोंयकारांच्या हातांत आशिल्लो. नुस्तें विकपी मनीस नुस्ते विकपाक दारां दारांन भोंवोन कोंकणींत उलयतालो. आयज मात वेगळीच भास आयकूंक येता. हो धंदो हातांतल्यान वचचो न्हय हे खातीर गोंयकारांनी खास करून तरणाट्यांनी फुडाकार घेवपाची गरज आसा. ह्या वेवसायात अर्थीक फायदोय आसा. वेवसायिकांक सगली मजत दिवपाक सरकार तयार आसा. तशेंच खात्या कडल्यान तंत्रीक आनी अर्थीक मजत मेळटा अशें मुख्यमंत्र्यान सांगलें.
नील क्रांतीचें सपन पुराय करतना दर्याची नितळसाण सांबाळप तितलेंच म्हत्वाचें अशें तांणी सांगलें. जायत्या जाणांक प्लास्टीक पोतयो वा हेर कोयर दर्यांत उडोवपाची संवय आसा. जाल्यार कांय उद्देगधंदेय अशुद्ध उदक सरळ दर्यांत सोडटात. हाका लागून दर्यांतलें प्रदुशण वाडत आसा. इतलेंच न्हय तर असो कोयर नुस्त्यांच्या पोटांत वचून तो परत आमच्या आंगांत येवपाची शक्यताय आसा. देखून आमी सगळ्यांनी सुतापुनवेच्या शुभ दिसा निमतान दर्यांत कोयर उडोवचे नात अशी सोपूत घेवची.
दर एका शारांत ‘मत्स्यवाहिनी’
सवाय दरांत नुस्तें दिवपा खातीर सुरू केल्ली ‘मत्स्यवाहिनी’ सेवा फुडल्या कांय काळांत राज्यांतल्या सगळ्या शारांनी उपलब्ध करपाचो यत्न सरकार करता. येवजणे खाला दिल्ल्यो दोन चाकी वा तीन चाकी गाडयो हेर कामां खातीर वापरिल्लीं मेळ्ळीं जाल्यार तीं परतून घेतले अशें मुख्यमंत्र्यान सांगलें.
फुडल्या वर्सा सावन बीएससी फिशरीज
फुडल्या शिक्षणीक वर्सा सावन बीएससी इन फिशरीज सायन्स अभ्यासक्रम सुरु करपाचो सरकारचो विचार आसा. हाका लागून थळाव्या विद्यार्थ्यांक शिक्षणा खातीर हेर राज्यांनी वचपाची गरज पडची ना अशेंय मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
