भांगरभूंय | प्रतिनिधी
१५ दिसां भीतर जाप दिवंक ना जाल्यार सुवात घेतले परतः खेळां मंत्री गावडे
पणजीः आंतरराष्ट्रीय क्रिकेट स्टेडियमा खातीर धारगळेची स्पोर्ट्स सीटीची सुवात वापरूंक नाशिल्ल्यान खेळां खात्यान गोंय क्रिकेट असोसिएशनाक (जीसीए) नोटीस काडल्या. १५ दिसां भितर तिका जाप दिवपाक सांगलां. सारकी जाप दिवंक ना जाल्यार खेळां खातें ही सुवात परत घेतलें, अशें खेळां मंत्री गोविंद गावडे हांणी सांगलें.
गोंयांत आंतरराष्ट्रीय दर्जाचें क्रिकेट स्टेडीयम केन्ना आनी खंय जातलें हाचेर अजूनय कोफुसांव चल्लां. स्टेडियमा खातीर पेडणें म्हालांतली धारगळ आनी दिवचल म्हालांतले म्हावळींगें ही सुवात पळयल्या. मात खंयचे सुवातेचेर हो स्टेडीयम येतलो हाचेर अजूनय स्पश्टीकरण करूंक ना.
हाचेर जाप दितना मंत्री गोविंद गावडे हांणी सांगलें, जीसीए वांगडा कबलात करून धारगळची सुवात स्टेडियमा खातीर दिल्ली. थंय अजून कसलेंच काम सुरू जावंक ना हें आमच्या लक्षांत आयलां. देखून आमी तांकां नोटीस काडल्या. तांणी रितसर १५ दिसां भितर जाप दिवप गरजेचें आसा. जर आमी घाल्ल्यो अटी ते पाळपाक अपेशी थारल्यार आनी प्रस्नांक सारकी जाप दिवंक ना जाल्यार आमी ही सुवात परत ताब्यांत घेतले, अशें गावडे हांणी सांगलें.
आमी ही नोटीस धारगळे स्पोर्ट्स सीटी विशीं जारी केल्या आनी जीसीएन पळयिल्ले दुसरे सुवातीचो प्रस्न आमचे कडेन येवंक ना. आमचें मत स्पश्ट आसा. जी जाप दिल्या ती कायदेशीर नदरेन सारकी आसा काय ना ती पळोवची पडटली, अशी म्हायती गावडे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
