भांगरभूंय | प्रतिनिधी
नगरनियोजन कायद्यात जातली दुरूस्ती : विश्वजीत राणे
पणजी : बेकायदेशीर दोंगर कापणे खातीर २५ लाखांचो तालांव घालपाची तजवीज केल्या. तशेंच नगरनियोजन कायद्यांत दुरूस्ती जातली. आतां मेरेन बेकायदो दोंगर कापणेचेर खात्यान ९०० गुन्यांव नोंद केल्यात. ऑर्चड जमिनीचेर भूखंड केल्यार कारवाय जातली, अशें नगरनियोजन मंत्री विश्वजीत राणे हांणी सांगलें.
नगरनियोजन मंडळाचे बसके उपरांत पत्रकार परिशदेंत मंत्री राणे हांणी ही म्हायती दिली. राज्यांत दोंगर बेकायदेशीरपणान कापपाचे प्रकार चालू आसात. कागाळ आयली काय खातें पळोवणी करून गुन्यांव दाखल करतात. न्यायालयांत विवीध कारणांक लागून खटलो तिगना. फकत गुन्यांव दाखल केलो म्हूण जावचें ना. नगरनियोजन कायदो खर करचो पडटलो. २५ टक्के ग्रेडीएंट (उतार) परस चड दोंगर कापणी जाल्यार २५ लाख रूपया तालांव पडटलो. ऑर्चड जमनीचेर भूखंड केल्यार कारवायेची तजवीज कायद्यांत जातली, अशें तांणी सांगलें.
वाळपय मतदारसंघांत धारखंड हांगा १०० बेकायदेशीरपणान जमनी भूखंड केल्यात. पंचांनी ही गजाल नदरेक हाडल्या उपरांत गुन्यांव नोंद केला.
हाचे फुडें व्हडल्या प्रकल्पांक वा इमारतींक हरीत प्रमाणपत्र घेवप सक्तीचें आसतलें. हे विशी मार्गदर्शक तत्वां वा नेम बेगिनूच तयार जातले, अशें मंत्री विश्वजीत राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
