भांगरभूंय | प्रतिनिधी
फोंडें, प्रतिनिधी ः तिस्क-उसगांव बाजारांत येरादारीचे कोंयडेची समस्या गंभीर जाल्या. वाठारांत बस स्टँड नाशिल्ल्यान प्रवाशांची गैरसोय जाता. प्रवासी बशी मुखेल रस्त्यार थारोवन प्रवाशांक घेतात, तशेंच रस्त्याच्या दोनूय वटांनी गाडयो पार्क केल्ल्यान येरादारी कोंयडी वाडत आसा. सरकारान ह्या प्रकरणाचेर गंभीरतायेन विचार करून येरादारी कोंयडीची समस्या सोडोवपा खातीर बस स्टँड उबारचो अशी मागणी प्रवासी करतात.
तिस्क उसगांवां साबार खाजगी, कदंब आनी कर्नाटकांतल्यो बशी दर दिसा यो- वच करतात. मोलें, सावड्डें, सांखळे, वाळपय, साकोड्डें, दाबाळ, फोंडें, पणजी, मडगांव आनी हेर सुवातींनी वचपी बशी रस्त्यार थांबून प्रवासी घेतात. हाका लागून बाजारांत येवपी लोकांक ह्या येरादारीचो त्रास जाता. बस स्टँड नाशिल्ल्यान प्रवाशांक रस्त्या कुशीक दुकानां मुखार उबे रावून बशीची वाट पळोवची पडटा.
राज्यांतल्या सगळ्या बाजारांत लोकां खातीर बस स्टँड उबारल्यात. फकत तिस्क- उसगांवां बस स्टँड बांदपाचो यत्न अजून जावंक ना अशें दिसता. ताका लागून सरकारान ह्या प्रकरणाचेर गंभीरतायेन विचार करून येरादारी कोंयडीची समस्या सोडोवपा खातीर बस स्टँड उबारचो अशी मागणी प्रवाशांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
