सध्याच्या अधिकाऱ्याचे बदले उपरांत मडगांव पालिकेक पूर्णवेळ मुख्याधिकारीः कामत

भांगरभूंय | प्रतिनिधी

मडगांव, प्रतिनिधी ः मडगांव पालिका मुख्याधिकारी पदाचेर मुखेल कार्यकारी म्हणून पूर्णवेळ अधिकाऱ्यांची नेमणूक करची अशें म्हजे मत आसा. राज्य सरकार कडल्यान प्रशासकीय अधिकाऱ्यांची बदली जातली ते वेळार मडगांव पालिकेक पूर्णवेळ मुख्याधिकारी मेळटलो. अतिरिक्त ताबो आसलो तरी सध्याचो मुख्याधिकारी बरे काम करतात अशें मत आमदार दिगंबर कामत हांणी उक्तायलें.
मडगांव पालिकेंत नागरीकांची कामा खातीर गर्दी जाता. लोकांची कामां उरतात. हांगा पूर्णवेळ मुख्याधिकारी आशिल्ल्या गौरीश शंखवाळकार हांची राज्य सरकारान बदली केल्या आनी अजीत पंचवाडकार हांकां ह्या पदाचो ताबो दिला. अजीत पंचवाडकारान दिसभरांत सुमार 200 फायली वांटून दिल्यो. कामत हांकां हे विशीं विचारलें तेन्ना अजीत पंचवाडकार हांणी हाचे आदीं मुख्याधिकारी म्हणून काम केलां. अतिरिक्त ताबो आसलो तरी बरें काम सुरू आसा. राज्य सरकारान कांय काळा खातीर मुख्याधिकारी बदलला तरी परतून अधिकाऱ्यांची बदली जातली. ताका लागून पूर्णवेळ मुख्याधिकार्‍यांची नेमणूक करतलें अशेंय स्पश्ट केलें.
मडगांव पालिकेच्या वॉर्ड क्रमांक 12 आनी 13 च्या उदरगतीच्या कामांचें उक्तावण आमदार दिगंबर कामत हांच्या हस्तुकीं जालें. ह्या वेळार राजेंद्र तालक, योगीराज कामत, नगरसेवक सगुन नायक आदी हाजीर आशिल्ले. आमदार कामत हांणी सांगलें, आमदारांच्या निधींतल्यान दर दोन वॉर्डांक एकठांय करून उदरगतीची कामां हातांत घेतल्यात. वॉर्ड 12 आनी 14 च्या गटारांची पुनबांदणी केले उपरांत वॉर्ड 14 आनी 15 च्या गटार बांदपाचें काम हातांत घेतले अशें तांणी स्पश्ट केलें.

तेन्नाच्या मुख्याधिकार्‍यांचेर परतून नगराध्यक्षांची टिका
कनिश्ट लिपिक योगेश शेटकार हांणी फकत तीन लाख फारीक केल्यात आनी तपास सुरू आसा अशें पुलीस सांगतात. बदली जाले उपरांत लेगीत मुख्याधिकार्‍यांनी घोटाळ्याच्या प्रकरणांत कितें घडलें तें सांगूंक ना. तशेंच वायफाय बिलांतय भानगड जाल्या. मुख्याधिकार्‍यांच्या सांगण्या प्रमाण कॅशियरान शेटकार हांच्या नांवान धनादेश काडलो. चवकशी केली तेन्ना वायफाय दिवपी कंपनीच अस्तित्वांत ना हें स्पश्ट जाले. तेन्नाच्या मुख्याधिकार्‍यांनी मडगांव पालिकेंत जायत्यो भानगडी केल्यात. वेळ येतकच सगळें भायर काडटले अशें नगराध्यक्ष दामोदर शिरोडकार हांणी सांगलें.