भांगरभूंय | प्रतिनिधी
हज यात्रे खातीरचे अर्ज उपलब्ध
मडगांव, प्रतिनिधीः हज यात्रे खातीर भक्तां कडल्यान ऑनलायन अर्ज मागयल्यात. आतां मेरेन 375 परस चड भक्तांनी हज यात्रेंत वांटो घेतला. हेर राज्यां परस गोंयांतल्या यात्रेकरुंक उणी रक्कम भरची पडटा अशें हज समितीचे अध्यक्ष उर्फान मुल्ला हांणी सांगलें. हज समिती खातीर पूर्णवेळ वांगडी सचीव दिवचो आनी ते खातीर निधीची वेवस्था करची. तशेंच राज्य हज समितीक मेळपी निधी वाडोवचो अशी मागणी तांणी राज्य सरकाराक केल्या.
उर्फान मुल्ला हांणी पत्रकार परिशद घेवन ही म्हायती दिली. तांणी फुडें सांगलें, केंद्रीय अल्पसंख्यांक खात्या कडल्यान यात्रेची तजवीज करतात. पोरूं 162 हज यात्रेकरुंनी वांटो घेतिल्लो. हज यात्रेकरुंक गोंयांतल्यान मुंबय आनी मुंबय सावन साउदी अरेबियाक धाडटात आनी तांची सुरक्षेचीय जतनाय राज्य आनी केंद्र सरकार घेता. पयलीं बायलांक हज यात्रेक वचपाक वांगडा कोणें तरी आसपाची गरज आसताली, पूण केंद्र सरकारान केल्ल्या बदलांक लागून आतां बायलांक एकटीच हज यात्रा करपाक मेळटा. केंद्र सरकार हज यात्रे खातीर खाशेलें विमान धाडटा. गोंयांतल्यान विमान धाडपाक सुमार 270 ते 300 यात्रेकरुं आसपाची गरज आसा. हज भक्तांचो आंकडो इतलो नाशिल्ल्यान तांकां विमानातल्यान प्रवास करपाक मुंबय वच्चें पडटा. चड भक्तांनी नांवनोंदणी केल्यार राज्य सरकार गोंयांतल्यान विमान धाडपाचो यत्न करपाक शकता.
हज यात्रे खातीर भरचे पडटले 3.21 लाख
गोंयच्या भक्तांक हज यात्रे खातीर शुल्क उणें केलां. देशांतल्या वेगवेगळ्या राज्यांतल्यान चड पयशे दिवचे पडटात जाल्यार गोंयांतल्या हज यात्रेकरुंक 3 लाख 21 हजार रुपया फारीक करचे पडटले. राज्य सरकाराच्या सुमार 30 लाखांच्या निधींतल्यान यात्रेकरुंक रावपाची वेवस्था, जेवण आनी येरादारीची वेवस्था करतात अशें उर्फान मुल्ला हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
