भांगरभूंय | प्रतिनिधी
नवी दिल्ली, खबरां संस्था: हालींच मुंबयचे एके इमारतीचे पांचवे माळयेवेल्यान सुणो सकयल पडून एके माणकुले चलयेक मरण आयिल्लें. ही खबर ताजी आसतनाच दिल्लींतल्या करोल बाग वाठारांतले इमारतीचे दुसरे माळयेवेल्यान एअर कंडिशन युनीट पडून एका तरणाट्याक मरण आयलें. जाल्यार एकलो जखमी जाला.
शेनवारा सांजेच्या ७ वरांचेर ही घडणूक घडली. ताचो व्हिडियो आतां सोशल मिडियाचेर व्हायरल जाला. ह्या व्हिडियोंत एक तरणाटो इमारती सकयले वटेन स्कुटर घेवन दिसता. ताचे कुशीक ताचो एक इश्ट उबो आसा. ते दोगूय उलयतात. उपरांत दोगूय एकामेकाक वेंग मारता. मागीर अचकीत इमारती वयल्यान दुचाकीवेल्या तरणाट्याचे तकलेर एसी युनीट पडटा अशें व्हिडियोंत दिसता.
ह्या अपघातांत दोगूय इश्ट जखमी जाले उपरांत त्या दोगांयकूय लागींच्या हॉस्पिटलांत व्हेले. तेन्ना दुचाकीवेल्या तरणाट्याक मरण आयिल्ल्याचें दोतोरांनी सांगलें. जाल्यार ताच्या इश्टाच्या हाताक दुखापत जाल्या.
मरण आयिल्ल्या तरणाट्याचें जितेश चड्डा (१८) नांव. जाल्यार ताचो इश्ट प्रांशु (१७) हो पटेल नगर हांगा रावता. ह्या अपघाता उपरांत पुलिसांनी गुन्यांव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
