भांगरभूंय | प्रतिनिधी
दिवचल, प्रतिनिधी : सहकार मळार फाटलीं अडतीस वर्सां कार्यरत आशिल्ल्या ‘बिचोली अर्बन कॉपरेटिव्ह बँके’चो चालू अर्थीक वर्साचो फायदो रू. ४.७० कोटींचेर पावला. बँकेन वट्ट तीन कोटी २२ लाख रुपयांचो निव्वळ फायदो जोडला. अंदूं भागधारकांक स टक्के लाभांश दितले. तशेंच एनपीए ० टक्के आशिल्ल्याची घोशणा बँकेचे अध्यक्ष गुरुदत्त संझगिरी हांणी बँकेच्या भागधारकांचे वर्सुकी बसकेंत केली.
मुखेल कार्यालयांतल्या नंदनवन सभाघरांत आयोजीत बँकेच्या ३९ वे बसकेंत उपाध्यक्ष प्रवीण झांट्ये, संचालक उमेश झांट्ये, रामचंद्र गर्दे, विनायक शिरोडकार, रामानंद नाटेकार, पल्लवी साळगांवकार, सुदेश नायक, रोहित झांट्ये, रोहिदास जल्मी, सुविधा कडकडे, सुरेश पर्रिकार तशेंच वेवस्थापकीय संचालक विठ्ठल प्रभुदेसाय आनी हेर हजर आशिल्ले.
ह्या वेळार बँकेचे अध्यक्ष संझगिरी हांणी सांगलें, बँकेच्यो वट्ट ठेवी रू. ५८७ कोटीं वयर पावल्यात. बँकेन वट्ट रू. २९५ कोटींचीं रिणां वाटल्यांत. बँकेच्या कच्च्या अनुत्पादित रिणां प्रमाण ५.९७ टक्के आशिल्ल्यान बँकेच्या इतिहासांत पयलेच फावट अनुत्पादित रिणांचें प्रमाण शुन्य टक्क्यांचेर आयलां. तशेंच बँकेच्या भांडवल पर्याप्तता प्रमाण १६.१८ टक्के आशिल्ल्यान तें रिझर्व्ह बँकेच्या निर्धारीत १२ टक्क्यां परस चड आसा.
देश पांवड्यार सहकार मळार जायतीं आव्हानां आसून लेगीत बँकेन आपल्या गिरायकांच्या, भागधारकांच्या, संचालक, अधिकारी आनी कर्मचारी वर्गाच्या सहकार्यान सेगीत व्हड येस मेळयलां. ह्यान फुडेंय अशेंच येस मेळपा खातीर सगळ्यांनी सहकार्य करपाचो उलो संझगिरी हांणी मारलो.
ह्या वेळार जायत्या भागधारकांनी बँकेन केल्ले उत्कृश्ट कामगिरी विशीं परबीं भेटयलीं. कॅजिटल वाझ, राजेश आमोणकार, नरेश कडकडे, सूर्यकांत देसाय आनी हेरांनी सगळ्यांक परबीं भेटयलीं. विठ्ल प्रभुदेसाय हांणी वर्सुकी अहवाल सादर केलो.
अंदूं बँकेचो एनपीए ०% आशिल्ल्याचें तांणी सांगलें. विवीध भागधारकांनी कांय सुचवण्यो केल्यो. तशेंच भागधारकांचे दुबाव प्रभुदेसाय हांणी पयस केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
