दवर्ले घराक उजो लागून लुकसाण
भांगरभूंय | प्रतिनिधी
मडगांव : दवर्ली पंचायती लागसारच्या रायकार हांच्या घराक उजो लागपाची घडणूक सोमारा सकाळीं घडली. उजो पालोवपी दळान ह्या उज्याचेर नियंत्रण मेळयलें. उजो शॉर्ट सर्कीटाक लागून लागिल्ल्याचो अदमास उक्तायला. हातूंत शेडी सयत हेर सामान लाशिल्ल्यान लाखांनी रुपयांचें लुकसाण जालां.
चड म्हायती प्रमाण, तेरेझा रायकर हांच्या घराचे वयले वटेनचे एके कुडीक सोमारा सकाळीं सुमार सवाय सात वरांचेर उजो लागलो. ह्या वेळार रायकार कुटुंबीयांची भुरग्यांक शाळेंत धाडपाची तयारी सुरू आशिल्ली. भुरग्यांक गाडयेंत बसोवन येतना घराचे वयले वटेन उजो लागिल्ल्याचें सजमलें. उपरांत घरांतली लायट बंद उडयली. मडगांव उजो पालोवपी दळाक म्हायती दिले उपरांत ते रोखडेच घडणुके सुवातेर दाखल जाले आनी उजो नियंत्रणांत हाडलो.
ह्या उज्यांत कुडींत आशिल्लें वॉशींग मशीन, भुरग्यांचें अभ्यासाचें सामान, उबारिल्ली शेड आनी हेर सामानाचें लुकसाण जालें. तेरेझा रायकार हांणी दिल्ले म्हायती प्रमाण तीन म्हयन्यां पयलींच टेर्रेसाचेर शेडीचें बांदकाम करून नवें लायटीचें कनेक्शन जोडिल्लें. हातूंत दोन लाखां परस चड लुकसाण जाल्ल्याचो अदमास उक्तायला. उजो पालोवपी दळान आजूनय अदमासपत्रक तयार करूंक ना. घडणुकेची म्हायती मेळटाच मायणा कुडटरचे पुलिसूय घडणुके सुवातेर पावल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
