भांगरभूंय | प्रतिनिधी
कॅ. विरियातो फर्नांडीसः केंद्रीय मंत्र्या कडेन चर्चा करपाचें आस्वासन
भांगरभूंय । प्रतिनिधी
फोंडें: भोमा गांवांतलीं घरां आनी देवळां मोडचे परस सरकारान बायपास रस्त्या खातीर यत्न करपाक जाय. बायबास रस्त्या खातीर थळावे लोक लढो दितात. पूण अजून मेरेन गोंय सरकारान उपाय काडपाचो यत्न करूंक ना. ताका लागून केंद्रीय मंत्री नितीन गडकरी हांचे कडेन चर्चा करून उपाय काडपाचो यत्न करतले. गरज पडली जाल्यार थळाव्या लोकांचें शिश्टमंडळ व्हरतले, अशें आस्वासन दक्षीण गोंयचे खासदार कॅप्टन विरियातो फर्नांडीस हांणी भोम गांवच्या लोकांक दिलें.
आयतारा सांजे वेळार खासदार कॅ. फर्नांडीस हांणी भोम गांवच्या लोकांची भेट घेवन चर्चा केली. त्या वेळार काँग्रेस प्रदेशाध्यक्ष अमीत पाटकार, संजय नायक, अॅड. सुरेल तिळवे, रामकृष्ण जल्मी, स्वप्नेश शिर्लेकार आनी हेर लोक हाजीर आशिल्ले. लोकांचे प्रस्न सोडोवचे खातीर गोंय सरकार यत्न करिना. उरफाटे कोळशाची येरादारी करचे खातीर सरकार गांवांतल्यान रस्तो तयार करून संस्कृती नश्ट करपाचो यत्न करता. तेच वांगडा गोंयांत सनबर्न आयोजीत करून ड्रग्स वेवसायाक चालना दिवपाचो यत्न सरकार करता. ते खातीर लोकांनी सतर्क रावपाची गरज आसा, अशें खासदार कॅ. फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
