भांगरभूंय | प्रतिनिधी
मोरजेकारांचें देवांक भौशीक गाराणें
भांगरभूंय । प्रतिनिधी
पेडणें: मोरजी पंचायत वाठारांत व्हडा प्रमाणांत जमीन रूपांतर आनी दोंगर कापणी प्रकरणांत जे कोण वांटेकार जातात तांकां कडक ख्यास्त करची, अशे गाराणें भाटीवाडो- मोरजेच्या शेतकार, जमीनदार, लोकांनी श्री देव सत्पुरुष आनी श्री देव कानडी वंश देवाक घातलें.
मोरजी पंचायत वाठारांतल्या दोंगराळ वाठारांत व्हडा प्रमाणांत जमनी रुपांतरीत जाल्यात. ह्या दोंगरांचेर व्हडले- व्हडले प्रकल्प निर्माण जातात. भायल्यांनी ह्यो जमनी विकत्यो घेतल्यात. ह्यो जमनी विकत्यो घेतना देवाचीं थळां आसात, परंपरीक वाटो आसात त्यो वाटोय बंद केल्यात. देवांच्या थळां कडेन वचपी वाटो आडोवपाचोय प्रकार घडला. हातूंत जे कोण वांटेकार आसात ताका ख्यास्त दिवची, अशें गाराणें लोकांनी देवाक घातलें. बिगर गोंयकारांनी राजकारण्यांक लागीं रावून जमीन रुपांतरणाचीं कागदां तयार केलीं. ह्या जमनींनी रस्ते करतात. तशेंच व्हिला, फार्म हावस बांदपाचेंय काम सध्या थंय चल्लां. कांय जाणांच्या जमनींचेर अतिक्रमण केलां. थंय देवाचीं थळां आसात. धर्मीक विधी करपाक दरेक वेळा भाविकांक थंय वच्चें पडटा. थंय वचपाची पांयवाटूय आडयल्या. ताका लागून ह्या प्रकरणांत जे वाटेकार आसात तांकां तीन दिसां भितर देवान ख्यास्त दिवची, अशेंय लोकांनी देवा मुखार मागलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
