भांगरभूंय | प्रतिनिधी
रमेश तवडकारः मुख्यमंत्र्यान मंजुरी दिल्ल्याचें स्पश्ट
भांगरभूंय । प्रतिनिधी
काणकोणः काणकोणचो आमदार सभापती आशिल्ल्यान काणकोणच्यो समस्या विधानसभेंत कोण मांडटलो, असो प्रस्न उपस्थीत करून कांय जाणांनी काणकोणां येवन जनता दरबार घेतले. काणकोणचो आमदार ह्या नात्यान काणकोणच्या उदरगतीच्या कामां बाबतींत आपूण हेर म्हालां परस ‘रेकोर्ड ब्रेक’ कामां करचे खातीर मुख्यमंत्री डॉ. प्रमोद सावंत हांणी मंजुरी दिल्या, अशें सभापती रमेश तवडकार हांणी काणकोणच्या सरकारी विसवघरांत घेतिल्ले पत्रकार परिशदेंत सांगलें.
ह्या वेळार मंडळ अध्यक्ष विशाल देसाय, सरचिटणीस दिवाकर पागी, शाबा नायक गांवकार, संजू तिळवे आनी प्रभाकर गांवकार हाजीर आशिल्ले. राष्ट्रीय म्हामार्ग बांदचे खातीर उसकिणीबांद ते बेंदुर्डे, बेंद्रुडें ते चाररस्तो वाठारांत जमीन संपादीत करचे खातीर जमीन संपादन प्रक्रिया सुरू जाल्या. गावणे धरणाचें उदक गांवडोंगरी, खोतीगांव आनी आमोण्यां व्हरचे खातीर तीन पांवड्याचेर हें काम जातलें. ते खातीर निधी मंजूर जाला. काणकोण हॉस्पिटला लागसार पोरणीं दुकानां आसात थंय काणकोणचे मामलेदार संकूल बांदपाचो विचार आसा. चाररस्तो ते शेळेर मेरेन सोबितीकरण, तळपणां खेळां मैदाना खातीर 2 कोटी 43 लाख रुपया मंजूर जाल्यात. लोलयें पंचायत वाठारांत नवे मसुंडे खातीर मंजुरी मेळ्ळ्या. पैंगीणच्या खेळां मैदाना खातीर अडेज कोटी रुपयांची मंजुरी मेळ्ळ्या. काणकोणचें मार्केट बांदचे खातीर निधी मंजूर जाला. श्रीस्थळ पंचायत वाठारांतले रस्ते आनी गटारां बांदचे खातीर निधी मंजूर जाला. भौशीक बांदकाम खात्या वतीन 31 कोटी 31 लाख रुपया, शिंपणावळ खात्या वतीन 25 कोटी 24 लाख रुपया, चाररस्तो ते शेळेर मेरेन सोबितीकरणा खातीर 20 कोटी जाल्यार पंचायत वाठाराचे उदरगती खातीर 16 कोटी रुपाय मंजूर जाल्यात. कांय उदरगतीच्या कामां संबंदांतल्यो फायली तयार केल्यात. फुडल्या कांय काळांत सुमार 500 कोटी रुपयांचीं उदरगतीचीं कामां जातलीं. काणकोम पालिका वाठारांत लेगीत मसुंडी बांदपाक मेळटा, तशी जमीन मेळपाक जाय, अशें तवडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
