भांगरभूंय | प्रतिनिधी
मुख्यमंत्री प्रमोद सावंत हांणी लक्ष घालपाची मागणी
फोंडें, प्रतिनिधी: तामसडो – धारबांदोडेंची बालवाडी स्थलांतरीत करपाचो आदेश शिक्षण खात्या कडल्यान येवंक नाशिल्ल्यान पालकांनी तिडक उक्तायल्या. बालवाडींतली जमीन ओली जाल्ल्यान ६ ऑगस्टा सावन पालकांनी भुरग्यांक बालवाडींत धाडपाचें बंद केलां. लागसारच्या सरकारी मुळाव्या विद्यालयांत बालवाडी स्थलांतर करपा खातीर बायलां आनी बाल कल्याण खात्यान शिक्षण खात्या कडेन परवानगी मागिल्ली. मात आजूनय शिक्षण खात्याक बालवाडी स्थलांतर करपाचो आदेश येवंक नाशिल्ल्यान शिक्षण मंत्री तशेंच मुख्यमंत्री प्रमोद सावंत हांणी हे विशीं स्वता लक्ष घालपाची मागणी पालक करतात.
बालवाडींत वट्ट २५ भुरगीं हजेरी लायतालीं. भाड्याचे कुडींत सुरू आशिल्ले हे बालवाडीची भितरली जमीन ओली जाल्ल्यान पालकांनी भुरग्यांक हेर कडेन स्थलांतर करपाची मागणी केल्ली. हे विशीं बहिश्कार घातले उपरांत हाची दखल घेवन धारबांदोडेंचे उपजिल्लोधिकारी निलेश धायगोडकार हांणी थळावे सरपंच, संबंदीत अधिकारी आनी पालकांची बसका घेतिल्ली. तेन्ना बालवाडी सरकारी मुळावे शाळेंत स्थलांतरीत करपाचो निर्णय घेतिल्लो. ताका लागून सरकाराक पत्र घाडिल्लें. मात आजूनय शिक्षण खात्या कडल्यान कसलोच आदेश येवंक ना. शिक्षण मंत्री तशेंच मुख्यमंत्री प्रमोद सावंत हांणी बेगोबेग आदेश जारी करपाची मागणी पालक करतात.
सुत्रां कडल्यान मेळिल्ले म्हायती प्रमाण शिक्षण खात्याच्या अधिकार्यांनी ही फायल शिक्षण मंत्री प्रमोद सावंत हांच्या कार्यालयांत बारा दिसां पयलीं धाडल्या. मात आजूनय तिचेर सय जावंक ना. ताका लागून ही बालवाडी स्थलांतरीत करपाचो निर्णय आडकून उरला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
