भांगरभूंय | प्रतिनिधी
पेडणें, प्रतिनिधी: मोरजी पंचायत वाठारांत व्हडा प्रमाणांत जमीन रूपांतर आनी दोंगर कांपणी प्रकरणांत जे कोण वांटेकार जातात तांकां कडक ख्यास्त करची, अशे गाराणें भाटीवाडो- मोरजेच्या शेतकार, जमीनदार, नागरिकांनी श्री देव सत्पुरुष आनी श्री देव कानडी वंश देवाक घालें.
मोरजे पंचायत वाठारांतल्या दोंगराळ भागांत व्हडा प्रमाणांत जमनी रुपांतरीत जाल्या. ह्या दोंगरांचेर व्हडले- व्हडले प्रकल्प निर्माण जातात. भायल्यांनी ह्यो जमनी विकत्यो घेतल्यात. ह्यो जमनी विकत्यो घेतना देवळाचीं थळां आसात, परंपरीक वाटो आसात त्यो वाटोय बंद केल्यात. देवांच्या थळां कडेन वचपी वाटो आडोवपाचोय प्रकार घडला. हातूंत जे कोण वांटेकार आसात ताका ख्यास्त दिवची, अशें गाराणें लोकांनी देवाक घालें.
बिगर गोंयकारांनी राजकारण्यांक लागीं रावन जमीन रूपांतराचीं कागदां तयार केलीं. ह्या जमनींनी रस्ते करतात. तशेंच व्हिला, फार्म हावज उबारपाचेंय काम सध्या हांगा चल्लां. कांय जाणांच्या जमनींचेर अतिक्रमण केलां. हांगा देवाचीं थळां आसात. धर्मीक विधी करपाक दरेक वेळा भक्ताक थंय वच्चें पडटा. थंय वचपाची पांयवाटून आडयल्या. ताका लागून ह्या प्रकरणांत जे वाटेकार आसात तांकां तीन दिसां भितर देवान ख्यास्त दिवची, अशेंय लोकांनी देवा मुखार मागलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
