भांगरभूंय | प्रतिनिधी
पणजी: कला संस्कृतीक मळार मुखार आशिल्ली भांगराळें गोंय अस्मिताय संस्थेन विवीध उपक्रम चालीक लायल्यात. कला सादरीकरण, निर्मिती, प्रशिक्षण आनी प्रोत्साहन तेचप्रमाण पुरस्कार येवजण अशे तरेन वावुरपी हे संस्थेन पोरूं वर्सा सावन ‘घुमट शामेळ वादन’ प्रशिक्षण कार्यशाळा आयोजीत करूंक सुरवात केल्या. अंदू वर्सा तारीख 20 ऑगस्ट ते 27 ऑगस्ट 2024 इतले मजगती ही कार्यशाळा जातली.
हे वर्सा सावन घुमट शामेळ प्रशिक्षणा वांगडा गणपती मातीकला कलेचीय खास सत्रां ह्या 7 दिसांचे कार्यशाळेंत घेवपाचीं अशें भांगराळें गोंय अस्मिताय संस्थेच्या युवा विभागान थरयलां.
पोरूं वर्सा जाल्ले अशे कार्यशाळेक मेळिल्लो उपाट प्रतिसाद अंदू वर्साय कायम उरता अशे तरेची मागणी इत्सूक प्रशिक्षणार्थी कलाकारां कडल्यान आयिल्ल्यान ही कार्यशाळा वेळार जाहीर करतात.
ही कार्यशाळा 20 ऑगस्ट ते 27 ऑगस्ट अशा कार्यकाळांत मारूती मंदीर, मारूती नगर- रुमडामळ- दवर्ली हांगां जातली. सांजवेळार 5.00 ते 6.00 घुमट- शामेळ वादन प्रशिक्षण जाल्यार 6.00 ते 7.00 मजगती मातीकाम प्रशिक्षण चलतलें.
प्रशिक्षण घेवपी विध्यार्थ्यांक समारोप सुवाळ्याक प्रमाणपत्रां भेटयतले. कार्यशाळेंत तयार जाल्ल्या मातिकाम मुर्त्यांचें खास प्रदर्शन तेचप्रमाण घुमट- शामेळ वादनाची खास कार्यावळींत वांटो घेवपी प्रशिक्षणार्थ्यांचे खास सादरीकरण जातलें. कार्यशाळेंत वांटो घेवंक इत्सूक आशिल्ल्या तशेंच 10 वर्सां वयर पिरायेच्या प्रशिक्षणार्थ्यांनी नोंद घेवची. घुमट- शामेळ वादन प्रशिक्षणाखातीर- 1000/- रुपया आनी मातीकाम कला प्रदर्शना खातीर- 500/- रुपया अशी फी भरची पडटली. अदीक म्हायती खातीर अवधूत केरकार (8530201103) तशेंच केदार सावंत (8007577006) हांकां संपर्क करचो अशें आयोजकांनीं कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
