भांगरभूंय | प्रतिनिधी
पणजी: राष्ट्रीय स्वयंसेवक संघाचे आदले अखील भारतीय बौद्धिक मुखेली, ज्येश्ट विचारवंत आनी लेखक स. रंगा हरीजी, केरळ हांच्या मूळ मल्याळम भाशेंत बरयिल्लें ’गोंयच्यो धर्मांतर कथा आनी व्यथा’ ह्या ग्रंथाचें प्रकाशन मंगळार २० ऑगस्ट दिसा सांजेवेळार ५:३० जातलें. ही कार्यावळ पणजेच्या इन्स्टिट्यूट मिनेझीस ब्रागांझा सभाघरांत जातली.
स. रंगा हरीजी हे गोंयच्यान स्थलांतरीत जाल्ले गोंयच्या पुर्वजांचे वंश आशिल्ले. ते कोंकणी उलयताले. तांणी मल्याळम भाशेंत २२ पुस्तकां बरयलीं. तशेंच इंग्लीश भाशेंतूय तांचें लेखन आनी ग्रंथ प्रकाशीत जाल्यात. रंगा हरीजी हांकां फाटल्या वर्सा मरण आयलें.
गोंय तांचे मूळ आशिल्ल्यान तांकां सदांच गोंयां विशीं आस्था आशिल्ली. हे आस्थेनूच १६-१७ व्या शेकड्यांत ‘गोंयच्यान गोंयकार कित्याक आनी कशे स्थलांतरीत जाले’ हाचो पुराय इतिहास, पुर्तुगेज काळांतलें सरकार, प्रशासन, धर्मशासन, इंन्क्विझिशन आनी धर्मीक छळ अशे जायते विशय घेवन तांणी मूळ मल्याळम भाशेंत बरयिल्ले. ताचो मराठी अणकार सुनेत्रा जोग हांणी केलो. भारतीय विचार साधना, पुणे हे संस्थेन ह्या पुस्तकाचें प्रकाशन केलां. हाचे पयलीं ह्या पुस्तकाचो इंग्लीश आनी कोंकणींतल्यान अणकार जाला. संजना प्रकाशन हे संस्थेन हें पुस्तक प्रकाशीत केलां.
ह्या पुस्तकाचें प्रकाशन ता. २० ऑगस्टाक गोंयचे मुख्यमंत्री डॉ. प्रमोद सावंत हांचे हस्तुकीं जातलें. हे कार्यावळीक मुखेल सोयरी म्हणून नामनेची समाजीक कार्यकर्ती शेफाली वैद्य, पुणे हांगा हाजीर रावतली. तशेंच स. रंगा हरीजी हांचे इश्ट आनी कोंकणी चळवळींतले ज्येश्ठ फुडारी रमेश पै, केरळ हे कार्यावळीक हाजीर रावतले. हे कार्यावळीक सगळ्या इतिहास प्रेमींनी आनी नागरिकांनी हाजीर रावचें, असो उलो भारतीय विचार साधना, पुणे आनी राष्ट्रीय स्वधर्म संस्कार मंडळ, पणजी ह्या संस्थांनी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
