भांगरभूंय | प्रतिनिधी
बिजींग, खबरां संस्था: फाटल्या कांय वर्सां सावन सगळेच कडेन डिजिटल पद्दतीन कामां सुरू आसात. तशेंच हालींच्या काळांत देवाक दिल्ली देणगी लेगीत हेच पद्दतीन एकठांय करतात. हाचीं उदाहरणां जायत्या सुवातींनी पळोवंक मेळटात. मात वेगान मुखार सरपी ह्या तंत्रगिन्यानाचें एके तरेचें लुकसाण आसा आनी तीं म्हळ्यार फटींगपणां.
पुराय संवसार डिजिटलायझेशनाच्या मार्गाचेर आसतना लेगीत ऑनलायन फटवणूक वा पयशे लुटपाच्यो जायत्यो घडणुको घडटात. हातूंत आनीक एक धक्को दिवपी फटींगपणाची घडणूक घडल्या. फटोवपी चोरांनी देवाचें दार लेगीत सोडूंक ना.
देवाच्या दारांतूय फटींगपणां
सध्या ह्या विशयाचेर संवसारीक माध्यमांनी चर्चा सुरू आसा, आनी ही खबर चीनांतल्यान आयल्या. जंय कायद्याचें शिक्षण घेवपी एका पद्वीदारान बौद्ध देवळांतल्यान दान स्वरुपांतले रकमे वरवीं फटींगपणां करून आपलें खातें भरलें. ताची चोरयेची शैली पळोवन पुलीसूय घुस्पले. रोखडोच ह्या सुशिक्षीत चोराक धरलो.
सोशल मिडियाचेर जाहीर केल्ल्या खबरां प्रमाण, आरोपीन देवळांत आशिल्ल्या क्यूआर कोडच्या जाग्यार स्वताचो क्यूआर कोड लायलो. ताका लागून देवाक देणगी दिवपी भक्तांची रक्कम सरळ ह्या तरणाट्याच्या खात्यांत वताली. कायद्याची पद्वी घेवपी ह्या तरणाट्यान केल्ली ही फटवणूक पळोवन सामान्य लोकांनी तिडक उक्तायल्या.
दक्षिण चीनांतल्या ‘मॉर्निंग पोस्ट’ च्या अहवाला प्रमाण हे पुराय घडणुकेचो व्हिडियो व्हायरल जाला. ज्यांतूंत देवळाचे भक्त देवा मुखार नमस्कार करतात तेन्नाच तो तरणाटो दान पेटीचेर आपलो क्यूआर कोड लायतना दिसता. ताका लागून देवाच्या निमतान ह्या देवळांत भक्तांनी दान केल्ली ती रक्कम सरळ ह्या तरणाट्याच्या खात्यांत वताली.
देवळांत अशीं फटींगपणां करपी ह्या तरणाट्याचें नांव आजून उक्तें जावंक ना. पूण थळाव्या पुलिसांचे म्हायती प्रमाण ताणें हो गुन्यांव कबूल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
