भांगरभूंय | प्रतिनिधी
भारताची कुस्ती खेळगडी विनेश फोगाट पॅरीस ऑलिम्पीक सर्तींत वांटो घेतल्या उपरांत काल भारतांत पावली. बायलांच्या फ्री स्टायल 50 कील वजन गटाचे फायनलींत ती पाविल्ली. पूण, फायनली पयलीं तिचें वजन गरजे परस 100 ग्राम चड आशिल्ल्यान तिका अपात्र थारायिल्ली. तिणें खेळां लवादा कडेन अपील केल्लें. पूण, तिचें अपील भायर मारलें. ते उपरांत ती आतां भारतांत परतून आयली.
नवी दिल्लीच्या इंदिरा गांधी विमानतळाचेर खेळां मोग्यांनी तिका उर्बेभरीत येवकार दिलो. व्हडा संख्येन लोक विमानतळाचेर आपल्याक येवकार दिवपाक आयिल्ल्याचें पळोवन फोगाच्या दोळ्यांत दुकां दाटलीं.
विमानतळा वयल्यान भायर सरल्या उपरांत ताच्या चाहत्यांनी, कुटुंवान आनी इश्टांनी ताळयो मारून तिका येवकार दिलो. आपल्याक तेंको दिल्ले खातीर सगल्या देशाच्या सगल्या लोकांचें आपूण उपकार मानता. खऱ्यानीच आपूण भाग्यशाली आसा अशें तिणें म्हणलें. तशेंच आपल्या गांवांत पावल्या उपरांत तिणें म्हणलें, जरी आपल्याक भांगरा पदक मेळूंक नासलें तरी तें लोकांनी आपल्याक दिलें. आपल्याक जो मोग आनी सन्मान दिलो, तो एक हजारा भांगरा पदकां परस मोलादीक आसा.
विनेशान सर्तीच्या पयल्या दिसा तीन बळिश्ट प्रतिस्पर्धी खेळगड्यांक हारोवन फायनलींत सुवात मेळयिल्ली. फायनलींत सुवात मेळोवपी ती भारताची पयली बायल कुस्ती खेळगडी थारिल्ली. पूण फायनली पयलीं तिचें वजन 100 ग्राम चड आशिल्लें. ताका लागून नेमां प्रमाण ऑलिम्पीक समितीन तिका अपात्र थारायत सगल्यांत निमाणी सुवात दिली. ह्या निर्णया आडची तिची याचिका लेगीत भायर मारली. पूण, भारतीयांनी तिचे कामगिरी विशीं आदर दाखयलो आनी तिणें केल्ले कामगिरीची तोखणाय केली. ताका लागून तिका येवकार लेगीत दबाज्यान दिलो.
तिका येवकार दिवपाक ऑलिम्पीक पदक जैतिवंत कुस्ती खेळगडो बजरंग पुनिया, साक्षी मलीक आनी बॉक्सर विजेंदर सिंग हे लेगीत उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
