भांगरभूंय | प्रतिनिधी
आदल्यान चालू….
अातां तियात्राच्या अभिनया कडेन थोडें लक्ष दिवया. आदल्या काळार अभिनयाच्या घटकांत उपचारीक परिक्षण अशें कांयच नासलें. पूण एक, जाणीव आसलले आनी समजीकायेचे दिग्दर्शक वा सांगाती कलाकार, जशे पररीथीं जुवाव आगोस्तीनो फेर्नांडीस, कराचीवाला, सायब रोचा, ए.एम. बी रोज, जे. पी सौजालीन, ए.आर सौजा फेरार्व, आदी सांगताले वा शिकयताले तें दर एकलो कलाकार उखलून दवरतालो खंय. आनी पयलेच नदरेक माचयेर एक पात्र दिश्टी पडटा तेन्ना ताच्या न्हेसपा आनी मेक-अपा उदेशींच त्या पात्राचो (कॅरिक्टर ) अभिनय कितें ताचो अदमास प्रेक्षकांक सोंपेपणीं मेळटालो. तेन्नाच्या तियात्रिस्तां मदीं उपचारीक शिक्षण घेतिल्ले भोव थोडे जाण आसले आनी ते थिएटर वा नाटका संबंदीं पुस्तकांतल्यान वाचून, नाटकां वा इंग्लेज प्ले पळोवन आनी समजून घेवन ही कला फुलोवंक आपल्या सांगाती तियात्रिस्तांक आधार आनी मार्गदर्शन करताले. त्या काळावेल्या कालाकारांक निजाचे कलेचें देणें आसलें आनी तें अदीक फळादीक आनी परिणामीक करूंक ते वावुरले म्हणल्यार जाता.
तेन्नाच्या तियात्र बरोवपी- दिग्दर्शकांक उपचारीक परिक्षण नासलें खरें तरी दर एका कलाकाराक मतींत धरून ते आपलें संहिता (स्क्रिप्ट) बरयताले. ही चाल तियात्र मळार खूब काळाक चल्ली. अशें आशिल्ल्यान तेन्ना एका पात्राचो अभिनय दुस-या पात्राक दिवप तितलें सोंपेपणी जायनासलें. त्या – त्या कलाकारांनी आपल्या तियात्रांत न्हेसपाचें सेर्त केले उपरांतूच दिग्दर्शक आपलें कथानक (प्लॉट) घेवन त्या – त्या कलाकाराक आपल्या मनांत दवरून आपलो तियात्र बरोवंक बसतालो आनी जुस्ताजूस्त संवग, संहिता आनी संवाद बरयतालो.
त्या काळार अडेचें सोडून सगळें निजाचें आनी बडिचें वसतालें. पालकार अभिनय करतानाच हांवें पळोवंक नाशिल्या कलाकारां मदीं जुवाव आगोस्तीनो फेर्नांडिसा शिवाय एल.डि.सी. ब्रांगाझा उर्फ रामा, आफोन्सेका, एर्मेलीन, ए.एम. बि. रोज, मीस मारेकीन, डेनीस सिमॉयस, मीस ज्युली, जे.आर. फिटना, मीस कार्लोता, एथनी डि सा, एथनी मेंडीस, विन्सेंट डे सालीगांव, ई. आल्मैदा, सालूझिनो डि कॉस्ता, सेसिलीया माचादो आदी हीं उत्कृश्ट अभिनय करपी कलाकारां वर्तलीं म्हण सांगतात.
आमच्या उगडासांत सॅबी कुतिन्हो हो अश्टताशी (वर्सटायल) निजाचो कलाकार वर्तलो, जो एकलोच अख्खी माची भरून हाडूंक शकतालो. सौजा फेर्राव, वालेन्त मास्कारेन्स, शालिनी मार्डोलकार, कीड बॉक्सर, ए.एस. कन्सेप्शन, टॉनी सॅक्स, फिलोमेना ब्राझ, सा. आल्वारीस, कामत डे असोळणा, जासिंन्तो वाझ, प्रेम कुमार, मॅरी वाझ, जेफसीस हिटलर, सी डी सिल्वा आदी अशीं उत्तम अभिनय करपी कलाकारां आसलीं.
भाटकाराच्या संवगांत झेतान अमर-उगडासाचे अभिनय करपी कलाकार सिरीयाको डायस आयजूय आमचे मदीं जियेता. सा आल्वारीसान पालकार हाडिल्ली साबार बायल कलाकारां मीस मोहाना, ऑफेलिया, जेस्सी, बॅटी फेर्न्स आदी तेच परीं बॅटी नाझ, जॉझेफिन, साबिना, प्लातिल्दा हांणी माचयेर उत्तम निजाच्यो भुमिका करून तियात्र पळेणारांच्या काळजांनी आपणाक खेरीत जागो सुगूर दवरिल्लो आसा.
उपरांत तियात्र माचयेक आनीकूय उत्कृश्ट अभिनय करपी कलाकारां जशे परीं पॉवल रॉमी, जो रोज, मायक मेहता, फातिमा, अनील कुमार, रोजारीयो डायस, शॅरोन, बाब पीटर आदी लाभलीं.
तियात्राच्या अभिनयाची एक विशेशताय म्हळ्यार माचयेर वागप आनी संवाद उच्चारप भोव नॅचरल वा निजाचे जातालें, जे वरवीं कलाकार, प्रेक्षकांचें लक्ष ओडून दवरुंक शकताले. संवगांत हावभाव संवाद उच्चारपांत अडेचो सूर वा सुवाद (फ्लेवर) बिल्कूल झळको नासलो. मुखेल पार्टीच्या अभिनयांत जावं विनोदांत बोबाट मारप बिल्कुल वसनासलें. तियात्राचो एक खेरीत आनी खाशेलो गूण म्हळ्यार सगळें निजाचेंच वसतालें. मागीर तियात्राच्या अभिनयांत अडेचें केन्ना, कशें आनी खंयच्यान आयलें काय?…
म्हाका याद जाता, तियात्राच्या आनी नॉन-स्टॉप ड्रामाच्या कलाकारांच्या सांगातीं जाल्ले एके जमातींत एम बॉयरान स्पश्ट एक विधान केल्लें, “आमकां तियात्र पालकार हाडूंक कलाकार जाय आसतात…”
(मुखार चलता)
लिप्यांतर : विशाल सिनाय खांडेपारकार, 8080622370
फाऊस्तो वि. दा. काॅस्ता
9821228684
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
