भांगरभूंय | प्रतिनिधी
भावंडांनो,
मनीस कुळयेंतलो दरेकलो खंयच्यान कार्याची वा कामाची सुरवात करचे पयलीं धाय दिकांची देवता श्रीगणेशाचें नांव घेता. पयलें वंदन, नमस्कार ताका करता आनी उपरांतच आपल्या कामांक सुरवात करता. इतलेंच न्हय तर सकाळीं उठ्ठकच दिसाची सुरुवात करचे पयलीं दोनूय हात जोडून प्रार्थना करता ‘कराग्रे वसते लक्ष्मीः करमध्ये सरस्वती । ’’ हय काय ना? जांकां प्रार्थना म्हणपाक येता ते दोनूय हात जोडून देवाचें नांव घेतात. कांय जाण न्हांवन-धुवन देवाऱ्याचेर वा देवा कुडींत वचून पुजा करतात, प्रार्थना करतात. त्या वेळार आपले खातीर, तशेंच घरांतल्या मनशांच्या हिता खातीर देवालागीं मागतात.
भावंडांनो, याद दवरात. आवय बापायक नमस्कार करून सगळ्यांच्या बऱ्या खातीर साद्या उतरांनी मनां सावन प्रार्थना करची.
भावंडांनो, ही प्रार्थना म्हणले उपरांत मनाक जी शांती, धादोसकाय, समादान मेळटा वा मनाची जी स्थिती जाता ती उर्बा दिवपी आसता. हें फकत प्रार्थना करतल्याकूच आनी म्हणटल्याकूच कळटा.
भावंडांनो, आमच्या जिवितांत प्रार्थनेक खूब म्हत्व आसा. आमचें आंग, धुयल्यार वा शाबू लायल्यार निवळ जाता. मात अमचें मन तशें निवळ जायना. तें प्रार्थनेन निवळ जाता. प्रार्थना, मनशा भितरल्यो सुप्त शक्ती जाग्यो करता. मनांत अयिल्लो वायट विचार प्रार्थने वरवीं पयस जाता. प्रार्थना म्हणटना मन एकाग्र जाता. आनी तेच खातीर प्रार्थना दरेकल्यान म्हत्वाची, गरजेची थारता. प्रार्थनेवेळार उतरांचो अर्थ मतींत घेवनूच ती म्हणपाक जाय आनी तशी म्हणल्यारूच ती फळादीक थारता.
भावंडांनो, अभ्यासाक, शिकवणेक सुरवात करचे पयलीं आमी जोडपणान एकवटीत रितीन प्रार्थना म्हणटात. हय काय ना? एकाच सुरांत, एकेच चालीन अनी एकेच लयेन. भावंडांनो, त्या वेळार एकवटाचे संस्कार आमचेर जातात. सकाळी फुडें प्रार्थना करतकच आमकां आमच्या कामा खातीर आनी अभ्यासा खातीर उमेद, शक्त आनी उर्बा मेळटा. तशेंच सांजवेळार घरांत दिवो लावन प्रार्थना करतकच घर प्रसन्न उरता.
भावंडांनो, तुमी जाणात? महात्मा गांधीजी प्रार्थनेक खूब म्हत्व दिताले. सत्याच्या आनी अहिंसेच्या आगऱ्या खातीर लागपी मानसीक बळगें तांकां मेळटालें.
प्रार्थनेन आमचें मन, अंतस्करण, प्रसन्न आनी शुद्ध उरता. प्रार्थना म्हणल्यार मनीसपणाचो धर्म जागयत देवाक मारिल्लो उलो. देखुनूच सांगतां, ही प्रार्थना केन्नाच चुकोवची न्हय. भावंडांनो चुकोवची ना न्हय तुमी? शाब्बास येयात तर आंगणांत.- उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
