भांगरभूंय | प्रतिनिधी
मुख्यमंत्रीः वैजकी संघटणे वतीन निवेदन सादर
भांगरभूंय । प्रतिनिधी
दिवचलः महिला दोतोराचेर कोलकातांत जाल्लो अत्याचार हो पश्चीम बंगालची मुख्यमंत्री ममता बॅनर्जी सरकाराचीं बेजापसदारपणा आनी घाळपणांक लागून जाला. मुख्यमंत्री डॉ. प्रमोद सावंत हांणी ममता बॅनर्जी हांचो खर उतरांनी निशेध केलो आनी तांचेर सणसणीत टिका केली. सांखळे ते प्रसार माध्यमां कडेन उलयताले.
कोलकारांतली घडणूक दोळे उक्तें करपाक लावपी आसा. भलायकी सेवा प्रामाणीकपणान करपी दोतोरांची सुरक्षा हो हुस्क्याचो विशय थारला. ताका पुरायपणान ममता सरकार जापसालदार आसा. एक महिला प्रतिनिदी आसून लेगीत असंवेदनशील वागणूक दितना ममता हांणी देशभरांतल्या लोकांची तिडक ओडून घेतल्या. कायदो सुवेवस्था पुराय तरेन ममताच्या राज्यांत इबाडल्या. तातूंत दोतोरांचेर हल्लो करप आनी हॉस्पिटलाची तोडफोड हें कित्याचें लक्षण आसा, असो प्रस्न मुख्यमंत्री डॉ. सावंत हांणी उपस्थीत केलो आनी ममता बॅनर्जी हांचो जाहीर निशेध केलो.
मजगतीं, दोतोरां वयल्या अत्याचारा आड वैजकी संघटणा गोंय फांट्या वतीन मुख्यमंत्र्यांक निवेदन सादर केलें. तातूंत दोतोरांची सुरक्षा हमी तशेंच कायदे खर करचे खातीर गरजेचे उपाय आंखून गुन्यांव तशेंच हिंसाचार आडावपाक अदीक खर कायदे करचे, अशें निवेदनांत म्हणलां, अशें संघटणेचे अध्यक्ष डॉ. संदेश चोडणकार, डॉ. शेखर साळकार, डॉ. चंद्रकांत शेट्ये, डॉ. राजश्री मराठे हांणी स्पश्ट केलें.
एकाद्या दोतोराचेर गुन्यांव घडलो जाल्यार फास्ट ट्रॅकाचेर ते विशीं निर्णय दिवचो. गोंयांतल्या वैतकी सुविधांची तपासणी करची. तशेंच काम करपाचे सुवातेर सुरक्षा वेवस्थेचेर विशेश लक्ष दिवचें. सुरक्षे बाबतींतल्या कायद्यांत बदल करचे. पुलीस पंगडा खाला विशेश टास्क फोर्स निर्माण करून विवेश लक्ष दिवचें, अश्यो मागण्यो निवेदनांत केल्यात. दोतोरांची सुरक्षा म्हत्वाची आसा. ते खातीर सरकारा वतीन सगळे तरेची खबरदारी घेतले, अशी हमी मुख्यमंत्री डॉ. सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
