भांगरभूंय | प्रतिनिधी
पणजी ः खाजगी भोंवडे वेळार राज्यांतल्या एका वरिश्ठ अधिकाऱ्याक एस्कॉर्ट पुलीस सेवा दिवपाक हलगर्जीपणा केल्ले खातीर हणजूण पुलीस स्टेशनाच्या ड्युटी मास्तराक सेवेंतल्यान निलंबीत केलो. हे संबंदी उत्तर गोंय पुलीस अधीक्षकान वायरलेस आदेश जारी केला.
मेळिल्ले म्हायती प्रमाण सर्वोच्च न्यायालयांतलो एक अधिकारी मोरजेच्या एका हॉटेलांत देंविल्लो. शुक्रारा 16 तारखेर सांजवेळार गोंय राज्य नागरी सेवेचो अधिकारी उल्लेख केल्ल्या अधिकाऱ्याक मेळपाक गेल्लो. शिवोले वाठारांत पावतकच ताणें हणजू पुलीस निरिक्षकाक एस्कॉर्ट पुलीस सेवा दिवपाची सुचोवणी दिली. ते उपरांत पुलीस ड्यूटी मास्तरान उल्लेख केल्ल्या अधिकाऱ्यांच्या बॉडीगार्डा कडेन संपर्क केलो. त्या वेळार पुलीस स्टेशन वाठारांत येरादारीची कोंयडी जाल्या, रॉबर्ट जीप थंय तैनात आसा आनी आमची जीप पावूंक शकना जाल्यार मागीर मांद्र्यां पुलिसां कडेन संपर्क करून वेवस्था करुन दिता अशें सांगलें.
पूण ह्या संवादा उपरांत उल्लेख केल्लो अधिकारी बेजार जालो आनी ताणें उत्तर गोंयच्या पुलीस अधीक्षका कडेन ड्यूटी मास्तराची कागाळ केली. ते उपरांत रोखडोच पुलीस अधीक्षकान वायरलेस संदेशा वरवीं त्या पुलीस कॉन्स्टेबलाक निलंबीत करपाचो आदेश जारी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
