भांगरभूंय | प्रतिनिधी
पणजी ः अवयवदान करून एक मडें उण्यांत उणें आठ जाणांचो जीव वाटावपाची तांक दवरता. हाचे विशीं लोकां मदीं जागृताय निर्माण करप म्हत्वाचें. बऱ्याच लोकांक हें खबर ना. अवयव दान दोन प्रकाराचें आसता. पयल्या प्रकारांत जिवो मनीस जिवो आसतना मूत्रपिंड वा यकृत दान करूंक शकता, जाल्यार दुसरो प्रकार मडें दान, हांतूत जेन्ना मनशाक ब्रेन डेड जाहीर करतात तेन्ना ताचे मूत्रपिंड, यकृत, काळीज, पुलमांव दान करूं येता. हाका लागून उण्यांत उणें आठ जाणांक जीवनदान दिवं येता. हेल्थवे हॉस्पिटलांतली नेफ्रोलॉजिस्ट डॉ. शीतल लेंगडे हांणी हें स्पश्ट केलें.
2019 वर्सा हॉस्पिटलांत अवयव प्रत्यारोपण कार्यावळ सुरू जाले उपरांत हेल्थवे हॉस्पिटलांन आतां मेरेन वट्ट 21 मुत्रपिंडांचें प्रत्यारोपण केल्यात, तातूंतले 20 जिवे दात्यांचे प्रत्यारोपण आनी एक प्रत्यारोपण मेल्ल्या मनशान दान केल्ल्या अवयवांतल्यान जाल्लें.
18 वर्सां वयले पिरायेचो कोणूय स्टेट ऑर्गन अँड टिश्यू ट्रान्सप्लांट ऑर्गनायझेशन (एसओटीटीओ) संकेतथळा वरवीं ऑनलायन वा गोंय वैजकी म्हाविद्यालयांत वचून ऑनलायन अवयव दाता म्हूण नोंदणी करूं शकता, जाल्यार 18 वर्सां सकयल आशिल्ल्यांक पालकांची संमती गरजेची आसा. दात्यांनी आपल्या कुटुंबाक कळयले उपरांतच अवयवदान करपाची निवड करची. हेल्थवे हॉस्पिटल जिव्या दात्यांचें मूत्रपिंड प्रत्यारोपण करतात. ह्या प्रत्यारोपणांनी लेगीत दातो कुटुंबांतलो वांगडी वा भागीदार आसूंक जाय आनी तशेंच हेल्थवे हॉस्पिटल डायलिसीस करपी दुयेंती खातीर मेल्ल्या दात्याच्या मूत्रपिंड प्रत्यारोपणाची वाट पळोवपी वळेरी दवरल्या. हे प्रक्रिये खातीर परवानो आशिल्ल्या गोंयांतल्या कांय सुविधां मदली ही एक अशें डॉ. लेंगडे हांणी सांगलें.
भारतांत अवयवदानाची मागणी उपलब्ध आशिल्ल्या पुरवणे परस कितल्याशाच पटींनी चड आसा. दर वर्सा सुमार दोन लाख लोकांचीं मुत्रपिंडां निकामी जातात. सध्या आमच्या भारतांत एक लाखां फाटल्यान फकत 1 मनीस अवयव दान करता, दान करपाक आमकां 65 जाणांची गरज आसा. लाखा फाटल्यान 65 लोकांनी अवयवदान केल्यार हजारांनी लोकांचे जीव वांटावतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
